ئەمریکا لە دوایین بنکەی سەربازیی لە سووریا کشایەوە

سووریا ــ AA

ھێزەکانی سوپای ئەمریکا بنکەی سەربازیی " قەسرەک" کە بە دوایین بنکەی سەربازییان لە پارێزگای حەسەکە باکووری ڕۆژھەڵاتی سووریا دادەندرێت، کشانەوە.

سەرچاوە خۆجێیەکان بە ئاژانسی ئانادۆڵویان ڕاگەیاند کە بەرەبەیانی ئەمڕۆ دووشەممە، ھێزەکانی ئەمریکا بنکەی سەربازیی " قەسرەک"یان لە ناوچەی تەل تەمر سەربە پارێزگای حەسەکە چۆڵکردووە.

بە گوتەی سەرچاوەکان، ھێزەکانی سوپای ئەمریکا دوای چۆڵکردنی بنکەی سەربایی "قەسرەک" بەرەو سنووریی عێراق کشاونەتەوە.

ئەمەش دوای ئەوە دێت بەم دواییانە ھێزەکانی سوپای ئەمریکا لە بنکەکانی تەنەف و شەدادی لە سووریا کشانەوە و بنکەکانیان ڕادەستی سوپای سووریا کردەوە.

پێشتریش ڕۆژنامەی "وۆڵ ستریت جۆرناڵ" بڵاویکردبوونەوە کە ئیدارەی ئەمریکا ئامادەکاریی دەکات تا لە میانی دوو ھەفتەی داھاتوودا، سەرجەم ھێزەکانی لە سووریا بکشێنێتەوە کە ژمارەیان ھەزار سەربازن.