ئەنقەرە - AA

سەرکۆماری قۆناغی ڕاگوزەری سووریا، ئەحمەد شەرع ئاماژەی بەوە کرد کە ماوەی چوار بۆ پێنج ساڵ لەبەردەستە بۆ هەڵبژاردنی سەرکۆمار لە وڵاتدا.

دوای گرتنەدەستی پۆستی سەرۆکایەتی کۆماری قۆناغی ڕاگوزەری سووریا، شەرع دیمانەیەکی لەگەڵ کەناڵی سووریا تی ڤی ئەنجام دا.

ئەحمەد شەرع ڕایگەیاند: ''بە بەشداری چینوتوێژەکانی گەلی سووریا لیژنەیەکی ئامادەکاریی بۆ کۆنفرانسی نیشتمانیی دادەمەزرێت و، لە کۆتایی کۆنفرانسەکەدا بەیاننامەی دەستوور بڵاودەکرێتەوە. ماوەی چوار بۆ پێنج ساڵ لەبەردەستە بۆ هەڵبژاردنی سەرۆکایەتی کۆمار''.

شەرع جەختی لەسەر ئەوە کردەوە ئەو بۆچوونەی دەڵێت سووریا لەلایەن تاکە کەسێکەوە بەڕێوەدەبرێت هەڵەیە و، ئازادییەکان لە چوارچێوەی یاساکاندا گشتگیر و فراوان دەبن، ئایندەی سووریا پشت بە سیستمێکی کۆماری دەبەستێت کە لە چوارچێوەیەکی یاساییدا کارگێڕی و پەرلەمان لەخۆدەگرێت، بەشێوەیەک بەرژەوەندی گشتیی بپارێزێت.

هەروەها شەرع ئەوەی وەبیرهێنایەوە کە نیوەی هاووڵاتیانی سووری لە دەرەوەی وڵاتن و، ژمارەیەکی زۆر ئاماری لەدایکبوون و مردن هەیە کە تۆمار نەکراون، هاوکات ئاماژەی بە ئاستەنگیی و سەختییەکانی ئەنجامدانی هەڵبژاردن کرد.

گوتیشی: ''هێشتا هەندێک ناوچەی سووریا لە دەرەوەی کۆنترۆڵی دەوڵەتە. لەبەرئەمە هەڵبژاردنەکان پێویستیان بە ژێرخانێک هەیە''.

سەرکۆماری قۆناغی ڕاگوزەری سووریا شەرع، تیشکی خستە سەر ئەوەی کە کاری لە پێشینەیان ئەوەیە چەکەکان کۆنترۆڵ بکەن و لە دەستی دەوڵەتدا کۆیان بکەنەوە و، گوتی: ''هەمووان جەخت لەسەر یەکێتیی سووریا و ڕەتکردنەوەی دابەشکردنی هەر بەشێکی دەکەنەوە''

شەرع ئەوەیشی خستەڕوو کە لەگەڵ ڕێکخراوی تیرۆریستیی پەکەکە|یەپەگە کە لە سووریا ناوی هەسەدە بەکاردەهێنێت کۆبونەوە کراوە، بەڵام بۆچوونیان جیاوازە.

ڕاشیگەیاند: ''لەگەڵ هەسەدە (پەکەکە|یەپەگە) کۆبوونەوە دەکرێت بۆ چارەسەر کردنی کێشەی باکووری ڕۆژهەڵاتی سووریا. هەسەدە نیشانیداوە کە ئامادەیە پەسەندی بکات چەکە تەنیا لەدەستی دەوڵەتدا بێت، بەڵام بۆچوونی جیاواز لە هەندێک وردەکارییدا هەیە''.