Erdoğan: Ku është kufoma e Khashoggit?

ANKARA (AA) - Tre javë pas zhdukjes së Jamal Khashoggit dhe një javë pasi zyrtarët sauditë pranuan se ai ishte vrarë në konsullatën e tyre, presidenti i Turqisë, Recep Tayyip Erdoğan, pyeti ku ka përfunduar kufoma e gazetarit saudit, raporton Anadolu Agency (AA).

“Është e qartë se është vrarë, por ku është kufoma, duhet ta tregoni atë”, tha Erdoğan në kryeqytetin turk Ankara, në një mbledhje të krerëve provincialë të Partisë për Drejtësi dhe Zhvillim (AK Parti).

“Këta 18 persona e dinë se nga kush është vrarë Khashoggi. Vrasësi është në mesin e tyre. Kush është bashkëpunëtori vendas, do t’i tregoni”, shtoi presidenti turk, duke iu referuar 18 personave që Arabia Saudite arrestoi pas njoftimit të vrasjes së gazetarit.

Erdoğan tha se Turqia posedon informacione dhe dokumente, por se nuk dëshirojnë që të jenë të ngutshëm.

Khashoggi, kolumnist për gazetën "The Washington Post", u zhduk pasi hyri në Konsullatën Saudite në Stamboll më 2 tetor.

Pas më shumë se dy javëve mohime mbi fatin e tij, Arabia Saudite javën e kaluar pohoi se Khashoggi u vra gjatë një sherri brenda konsullatës.

Më herët gjatë javës, disa llogari të shtypit cituan një zyrtar saudit të ketë thënë se trupi i është dhënë një "bashkëpunëtori lokal" për t’u marrë me të, por asnjë zyrtar saudit nuk ka dhënë deklaratë zyrtare për vendndodhjen e kufomës.

Erdoğan njoftoi se Arabia Saudite të dielën do të dërgojë kryeprokurorin në Turqi, ku do të takohet me homologun turk në Stamboll.

Ai tha gjithashtu se Turqia është duke ndarë informacionet dhe dokumentet e saj mbi rastin Khashoggi me palët relevante të interesuara dhe se ato i ka ndarë edhe me Arabinë Saudite.

Presidenti i Turqisë kërkoi nga Arabia Saudite të dorëzojë 18 personat e arrestuar për vrasjen e Khashoggit në mënyrë që të gjykohen në Turqi.

“Nëse dëshironi ta eliminoni këtë dyshim, pika kyçe e bashkëpunimit tonë janë këta 18 njerëz. Nëse nuk mund t’i bëni të flasin, atëherë na i dorëzoni që t’i gjykojmë ne, flisni. Ngjarja ndodhi në Konsullatën e Përgjithshme në Stamboll”, theksoi presidenti i Turqisë, Recep Tayyip Erdoğan.