Şerife Çetin
11 Korrik 2018•Përditësim: 11 Korrik 2018
BRUKSEL (AA) - Presidenti amerikan Donald Trump tha se "Gjermania i bën pagesa në nivel të lartë Rusisë për energjinë. Për këtë arsye ajo është një rob i Rusisë", transmeton Anadolu Agency (AA).
Trump në kuadër të samitit të NATO-s në një mëngjes pune me Sekretarin e Përgjithshëm të NATO-s Jens Stoltenberg ka bërë disa kritika për mos rritjen e shpenzimeve të mbrojtjes nga Gjermania dhe bashkëpunimin e saj me Rusinë për energjinë.
"Flitet se Evropën duhet ta ruajmë nga Rusia. Atëherë përse vendet e NATO-s i paguajë Rusisë miliarda dollarë për energjinë?", deklaroi Trump.
Presidenti Trump tha se është "shumë e papërshtatshme" që Gjermania të zhvillojë marrëveshje për naftën dhe gazin me Rusinë. "Gjermania i bën pagesa në nivel të lartë Rusisë për energjinë. Për këtë arsye Gjermania është një rob i Rusisë", tha ai.
Trump ka rikujtuar se Gjermania ka siguruar edhe një marrëveshje për linjën e një tubacioni gazi me Rusinë. Trump thotë se në këtë mënyrë Rusia falë gazit natyror do të kontrollojë 70 për qind të Gjermanisë.
"Vendet aleate të NATO-s jo brenda 10 vitesh por 'menjëherë' duhet të rritin shpenzimet e mbrojtjes", tha ai.
"Kjo është e papranueshme. Ne e mbrojmë Gjermaninë, Francën i mbrojmë të gjithë. Paguajmë shumë para. Dhe kjo ka vazhduar për shumë vite. Edhe presidentët e tjerë të SHBA-ve e kanë shtruar këtë çështje në rend dite por asnjëri prej tyre nuk ka bërë ndonjë gjë. Ose nuk e kanë kuptuar ose nuk kanë dashur të ndërhyjnë. Por, për vendin tonë kjo është një padrejtësi e madhe", theksoi presidenti amerikan.
Trump më tej shtoi se kryesisht shpenzimet e Gjermanisë janë në nivel shumë të ulët. "Gjermania është një vend shumë i pasur. Ajo mund të rrisë shpenzimet në moment, menjëherë nesër dhe nuk shkakton asnjë problem", potencoi Trump.
