Turqia dhe Mozambiku nënshkruajnë 6 marrëveshje bashkëpunimi

MAPUTO (AA) - Në kuadër të vizitës së Presidentit Recep Tayyip Erdoğan në Mozambik, mes këtij vendi dhe Turqisë, janë nënshkruar 6 marrëveshje bashkëpunimi në fusha të ndryshme, raporton Anadolu Agency (AA).

Në ndalesën e tij të dytë në kuadër të turit në Afrikë, Presidenti Erdoğan është takuar me Presidentin e Mozambikut, Filipe Nyusi dhe pas takimit në rezidencën presidenciale janë nënshkruar 6 marrëveshje mes palëve.

Në praninë e dy presidentëve mes Turqisë dhe Mozambikut janë nënshkruar 6 marrëveshje të ndryshme në fusha, si diplomaci, tregti, ekonomi, kulturë dhe turizëm. Marrëveshjet janë firmosur nga ministrat e dy vendeve.

Në fushën e diplomacisë është firmosur një marrëveshje për heqjen e ndërsjellë të vizave, ndërsa është firmosur gjithashtu një memorandum për ngritjen e një mekanizmi konsultimi politik. Kjo marrëveshje është firmosur nga ministri turk i Punëve të Jashtme, Mevlüt Çavuşoğlu.

Marrëveshja për bashkëpunimin ekonomik dhe tregtar është firmosur nga ministri i Ekonomisë, Nihat Zeybekci.

Ndërsa marrëveshjet në fushën e energjisë janë firmosur nga ministri turk i Energjetikës dhe Burimeve Natyrore, Berat Albayrak.