Vritet një izraelit në Bregun Perëndimor

Një kolon izraelit ka humbur jetën të enjten pasi ndaj automjetit të tij ishte hapur zjarr pranë një vendbanimi izraelit në veri të Bregut Perëndimor të pushtuar, transmeton Anadolu Agency (AA).

Kanali zyrtar izraelit KAN citoi një burim mjekësor izraelit i cili konfirmoi vdekjen nga të shtënat pranë post-bllokut Homesh, në perëndim të Nablusit. Dy izraelitë të tjerë po trajtohen për lëndime.

Kanali tha se nga një automjet me shpejtësi është hapur zjarr mbi automjetin e kolonëve që shkaktoi lëndime mbi tre izraelitë brenda, me një të shpallur të vdekur më vonë.

Automjeti nga i cili u hap zjarr u largua nga zona. Sipas kanalit izraelit një numër i madh përforcimesh të ushtrisë izraelite nxituan në zonë dhe filluan kërkimin për sulmuesit.

Ministri izraelit i Mbrojtjes, Benny Gantz tha se forcat izraelite janë në gatishmëri të lartë pas sulmit dhe u zotua të "kapin autorin".

Zëdhënësi i grupit palestinez Hamas, Hazem Qassem përshëndeti sulmin "heroik" dhe tha se ishte "kundër forcave pushtuese (izraelite) dhe kolonëve vrasës".

Sipas ligjit ndërkombëtar, të gjitha vendbanimet hebreje në territoret e pushtuara janë të paligjshme.