Ekip
19 Dhjetor 2017•Përditësim: 19 Dhjetor 2017
LONDËR (AA) - Rrjeti social Twitter ka mbyllur tre llogari që i kanë takuar grupit të së djathtës ekstreme "Britain First”, në vazhdën e rregullave të reja kundër abuzimit, raporton Anadolu Agency (AA).
Lideri i partisë "Britain First", Paul Golding dhe zëvendëskryetarja Jayda Fransen kanë konfirmuar se llogaritë e tyre janë të mbyllura nga pasditja e së hënës, ndërsa bashkë me dy llogaritë e lartpërmendura, është mbyllur edhe llogaria zyrtare e organizatës @BritainFirstHQ.
Edhe grupe tjera djathtiste janë përballur me mbyllje të llogarive të tyre, siç janë "English Defence League" dhe e djathta ekstreme "Generation Identity".
Rrjeti social është përballur me një kriticizëm në rritje se nuk po bën mjaft për të detektuar fjalorin e urrejtjes, duke u shndërruar kështu në një platformë për grupet e tilla.
"Rregullat dhe kushtet e reja të cilat u njoftuan në nëntor të këtij viti, janë pjesë e një fushate dy vjeçare për të luftuar përmbajtjet me qëllim të keq, dhe ato të papërshtatshme", tha shefi Ekzekutiv, Jack Dorsey.
Rregullat e reja ndalojnë përdoruesit të paraqesin veten si pjesëtar i një grupi apo organizate që promovon krimet nga urrejtja.
Përveç ndalimit të gjuhës së urrejtjes, Twitter ka ndaluar gjithashtu edhe përdorimin e imazheve ose simboleve të urrejtjes, duke njoftuar se shkelja e njërës prej rregullave do të çojë në një pezullim të përhershëm.
Fransen dhe grupi i saj "Britain First" tërhoqën vëmendjen globale në kohën kur presidenti amerikan Donald Trump, publikoi në Twitter disa video anti-islamike dhe nxitëse të cilat ajo i kishte postuar një muaj më parë.
Në fillim të javës së kaluar, ajo dhe Golding u mbajtën në paraburgim pas çka u paraqitën në seancën dëgjimore në gjyqin në Belfast, me akuza për gjuhën e urrejtjes dhe sjelljen që kishte për qëllim nxitjen e urrejtjes dhe ndasive.
