Servet Günerigök
19 Janar 2025•Përditësim: 21 Janar 2025
TikTok ka informuar përdoruesit në SHBA se ata nuk mund të përdorin aplikacionin e videove “për momentin” pas miratimit të një ndalimi ndaj shërbimeve të platformës sociale, transmeton Anadolu.
“Na vjen keq, TikTok nuk është i disponueshëm për momentin. Një ligj që ndalon TikTok-un është miratuar në SHBA. Për fat të keq, kjo do të thotë se ju nuk mund ta përdorni TikTok-un për momentin”, shkruhej një mesazh nga aplikacioni.
“Ne jemi me fat që presidenti Trump ka treguar se ai do të punojë me ne për një zgjidhje për të rikthyer TikTok-un sapo të marrë detyrën. Ju lutemi, qëndroni të sintonizuar”, thuhej më tej.
Përdoruesit ende lejohen të identifikohen për të shkarkuar të dhënat e tyre, por aplikacioni nuk është më i disponueshëm në App Store ose Google Play Store.
Kompania disa orë më parë njoftoi se do t’i bëjë shërbimet e saj “përkohësisht të padisponueshme”.
Të premten, Gjykata e Lartë e SHBA-së mbështeti një ligj për të ndaluar TikTok-un nëse kompania e saj mëmë ByteDance me bazë në Kinë nuk heq dorë nga aplikacioni. Gjykata amerikane vendosi se ultimatumi i shitjes ose ndalimit nuk shkel të drejtat e kompanisë në Amendamentin e Parë në Kushtetutën e SHBA-së.
Shtëpia e Bardhë tha se aplikacioni kinez i mediave sociale duhet të mbetet i disponueshëm në SHBA, por nën pronësinë amerikane për të adresuar shqetësimet e sigurisë kombëtare.
Presidenti i sapozgjedhur i SHBA-së, Donald Trump, i cili ka treguar simpati për TikTok-un, nesër rikthehet në Shtëpinë e Bardhë për të filluar mandatin e tij të tyre si president, një ditë pas afatit të largimit të TikTok-ut.
Trump kërkoi nga gjykata amerikane të shtyjë vendimin për negociata. Shefi ekzekutiv i TikTok-ut, Shou Zi Chew, pritet të marrë pjesë në inaugurimin e Trumpit.
Ligji dypartiak, i miratuar nga Kongresi dhe i nënshkruar nga presidenti Joe Biden, i dha kompanisë ByteDance 270 ditë për të hequr dorë ose për t’u përballur me një ndalim në SHBA.
