Rusia "optimiste me kujdes" për perspektivat e armëpushimit në Gaza

Zëdhënësi i Kremlinit, Dmitry Peskov, ka deklaruar se Rusia është "optimiste me kujdes" për mundësinë e një marrëveshjeje të hershme të armëpushimit në Rripin e Gazës, transmeton Anadolu.

Duke folur në një konferencë për media në Moskë, Peskov theksoi nevojën urgjente për të ndalur armiqësitë, duke përmendur krizën e rëndë humanitare në enklavën palestineze të bllokuar.

"Ky optimizëm i kujdesshëm buron nga katastrofa e tmerrshme humanitare që po shpaloset në Gaza, e cila vazhdon të përkeqësohet. Një armëpushim nevojitet urgjentisht për të lehtësuar vështirësitë çnjerëzore me të cilat përballen ata që ende banojnë në rajon", tha Peskov.

Izraeli dhe Hamasi thuhet se janë afër finalizimit të marrëveshjes për armëpushimin dhe lirimin e pengjeve, pasi mosmarrëveshjet janë duke u mbyllur në Doha të Katarit.

Në përgjigje të pyetjes në lidhje me datat e mundshme të vizitës në Moskë të liderit të Koresë së Veriut, Kim Jong-un, Peskov tha se informacioni specifik do të ndahet sapo të jetë i disponueshëm.

Kjo pason raportet e mediave të Koresë së Jugut që thonë se Shërbimi Informativ Kombëtar i vendit beson se vizita e Kimit në Rusi mund të ndodhë në muajt e ardhshëm.

Duke iu referuar planeve të Bashkimit Evropian (BE) për të ndaluar importet e aluminit primar nga Rusia, Peskov paralajmëroi se veprime të tilla mund të destabilizojnë tregun global.

"Ne jemi të vetëdijshëm për këto diskutime. Tregu për këtë segment është mjaft i brishtë dhe vendime të tilla hipotetikisht mund të çojnë në destabilizim domethënës", tha ai.

Lidhur me sanksionet e SHBA-së që vënë në shënjestër sektorin energjetik të Rusisë, Peskov theksoi se Moska mund të paraqesë kundërmasa.

"Rusia do të ndërmarra hapa për të minimizuar ndikimin e këtyre sanksioneve, duke i dhënë përparësi interesave të kompanive vendase", tha ai.

Më 10 janar, Departamenti i Thesarit i SHBA-së njoftoi sanksione kundër 13 individëve rusë, duke përfshirë drejtues të kompanive të mëdha të naftës.