Rusia e quan "armiqësor" vendimin e Armenisë për t'iu bashkuar Statutit të Romës

Ndërkohë që Armenia po përgatitet të ratifikojë Statutin e Romës të Gjykatës Ndërkombëtare Penale (GJNP), zëdhënësi i Kremlinit Dmitry Peskov reagoi ndaj hapit në fjalë, duke e quajtur atë “vendim jashtëzakonisht armiqësor”, raporton Anadolu.

Komisioni përkatës i Parlamentit të Armenisë dha opinion pozitiv për ratifikimin e Statutit të Romës, marrëveshjes themeluese të GJNP-së, dhe i ofroi Rusisë të nënshkruajë një marrëveshje dypalëshe për zbatimin e statutit.

Duke u prononcuar për gazetarët për këtë temë, Peskov tha se Armenia “e di mirë” se Rusia nuk është palë e Statutit të Romës.

Duke vënë në dukje se Armenia është gjithashtu në dijeni të vendimit të marrë nga GJNP-ja për të arrestuar presidentin rus Vladimir Putin, Peskov tha: “Ky është një vendim jashtëzakonisht armiqësor ndaj nesh. Nuk është një situatë me të cilën mund të pajtohemi”.

Ndërsa marrëdhëniet mes Rusisë dhe Armenisë janë tensionuar kohët e fundit, Ministria e Jashtme ruse së fundi i dha ​​një notë Armenisë me arsyetimin se po ndërmerrte hapa “jomiqësorë”.