Putin urdhëron inspektimin e nevojave të ushtrisë ruse

Presidenti i Rusisë, Vladimir Putin, ka udhëzuar qeverinë të përcaktojë dhe raportojë nevojat e ushtrisë ruse, transmeton Anadolu Agency (AA).

Duke folur në takimin e parë të një këshilli koordinues qeveritar për nevojat e Forcave të Armatosura Ruse, Putin tha se përpjekja duhet të përfshijë jo vetëm pajisjet materiale, por edhe nevojat sociale, të tilla si ndihma për të afërmit e ushtarëve.

Ai gjithashtu urdhëroi një rishikim të sistemit administrativ të ushtrisë për ta ndihmuar atë sa më parë të zgjidhë çështjet e furnizimeve dhe të kundërveproj sanksionet ekonomike.

“Deri më sot, Këshilli Koordinues duhet të ketë formuluar detyrat për disa sektorë. Nuk ka ende detyra të tilla, por nuk kam dyshim se ato do të vijnë në të ardhmen e afërt”, tha Putin.

Presidenti rus veçoi nevojën për të bërë uniforma dhe pajisje ushtarake komode, moderne dhe efektive.

Putin theksoi se modelet dhe dizajnet ekzistuese mund të ndryshohet, nëse është e nevojshme, për t’iu përgjigjur realiteteve në terren, duke shtuar se prodhuesit duhet të kërkojnë informacione nga ushtarët që shërbejnë në luftën e Rusisë në Ukrainë dhe të përshtatin uniformat në përputhje me rrethanat.

“Duhet të shfaqen objekte të reja prodhimi. Është e nevojshme të rritet konkurrenca për të pasur cilësi më të mirë në të gjitha drejtimet”, tha ai.

Putin gjithashtu theksoi se situata e sigurisë në Rusi ka ndryshuar dhe se zbatimi i ligjit në vend po përballet me sfida serioze.

Kryeministri Mikhail Mishustin gjithashtu foli në këshill. Nga ana e tij, ai theksoi se një studim paraprak tregoi domosdoshmërinë për të rritur prodhimin e rrobave dhe parzmoreve të trupit.

Qeveria tashmë ka ndarë fonde për plotësimin e këtyre nevojave.

Në mes të luftës në Ukrainë që filloi më 24 shkurt, forcat ukrainase javët e fundit kanë avancuar në një kundër-ofensivë, derisa Moska ka thirrur më shumë rezervistë dhe ka inkorporuar katër rajone të Ukrainës pas atyre që Perëndimi i denoncoi si referendume “të rreme”.