Elena Teslova
08 prill 2021•Përditësim: 09 prill 2021
Presidenti rus Vladimir Putin diskutoi situatën në Donbas të Ukrainës lindore me kancelaren gjermane Angela Merkel në një bisedë telefonike, transmeton Anadolu Agency (AA).
Putin dhe Merkel kanë shprehur shqetësim rreth rritjes së tensioneve në juglindje të Ukrainës, tha Kremlini në një deklaratë.
"Vladimir Putin tërhoqi vëmendjen për veprimet provokuese të Kievit, i cili kohët e fundit ka përshkallëzuar me qëllim situatën në vijën e kontaktit. Nevoja që autoritetet e Kievit të zbatojnë në mënyrë rigoroze marrëveshjet e arritura më parë u theksua, para së gjithash, për të vendosur një dialog të drejtpërdrejtë me Donetskun dhe Luhanskun dhe për të zyrtarizuar ligjërisht statusin e veçantë të Donbasit", thuhet në deklaratë.
Palët në konflikt u thirrën të ushtrojnë përmbajtje dhe të intensifikojnë procesin e negociatave për të zbatuar plotësisht Marrëveshjen e Minskut të vitit 2015 si një bazë joalternative për një zgjidhje, tha deklarata.
Të dy liderët riafirmuan angazhimin e tyre për një koordinim të mëtejshëm të ngushtë të përpjekjeve midis Rusisë dhe Gjermanisë, përfshirë formatin e Normandisë (Gjermania, Franca, Rusia dhe Ukraina), përmes këshilltarëve politikë dhe ministrive të jashtme.
Tensionet në kufirin Ukrainë-Rusi
Shefi i Shtabit të Ukrainës, Ruslan Khomchak, në një fjalim të mbajtur në Parlament më 30 mars deklaroi se Rusia me arsyetimin e stërvitjes ka kryer transferime ushtarake në afërsi të kufijve të Ukrainës.
Lidhur me zgjidhjen e krizës në rajonin Donbas, Grupi i Kontaktit Trepalësh, i përbërë nga Rusia, Ukraina dhe OSBE-ja, mori vendimin për një armëpushim gjithëpërfshirës që nga 27 korriku 2020.
Në konfliktet që vazhdojnë që nga viti 2014 mes qeverisë së Kievit dhe separatistëve pro-rusë të cilët kanë shpallur në rajon të ashtuquajturën pavarësi, kanë humbur jetën mbi 13 mijë persona.
