Parlamenti i Irakut miraton qeverinë e Mustafa al-Kadhimit

Parlamenti i Irakut miratoi kabinetin e kryeministrit të nominuar Mustafa al-Kadhimi pas disa ndryshimeve të minutës së fundit për të qetësuar partitë politike, transmeton Anadolu Agency (AA).

Parlamenti miratoi 15 nga gjithsej 22 ministrat e kabinetit të ardhshëm.

Pesë kandidatë për ministra u refuzuan ndërsa votimi për dy ministra u prolongua, duke lënë të zbrazëta shtatë ministri, përfshirë postet e rëndësishme si ministri i Naftës dhe i Punëve të Jashtme.

Kandidatët për Ministrinë e Drejtësisë, Ministrinë e Shpërnguljes dhe Migracionit, Ministrinë e Bujqësisë, Ministrinë e Tregtisë dhe Ministrinë e Kulturës dhe Turizmit u refuzuan.

Votimi për ministrin e Naftës dhe Punëve të Jashtme u prolongua për shkak se asnjë kandidat nuk ishte i caktuar.

Al-Kadhimi dhe 15 ministrat e votuar u betuan në Parlament.

Presidenti irakian, Barham Salih emëroi Al-Kadhimin, një ish-drejtor i Shërbimit Kombëtar të Inteligjencës Kombëtare të Irakut, si kryeministër më 9 prill.

Sipas kushtetutës së Irakut, Al-Kadhimi kërkohet të formojë qeverinë e re brenda një muaji.

Iraku është përfshirë nga protestat masive që nga fillimi i tetorit për kushtet e dobëta të jetesës dhe korrupsionit, duke detyruar kryeministrin Adil Abdul-Mahdi të jepte dorëheqje.

Sipas Komisionit irakian për të drejtat e njeriut, më shumë se 600 persona janë vrarë dhe 17.000 të tjerë janë plagosur në protestat e deritanishme.