Beyza Binnur Dönmez
12 Dhjetor 2025•Përditësim: 12 Dhjetor 2025
Organizata Botërore e Shëndetësisë (OBSH) tha sot se ka lehtësuar transferimin e pacientit të parë në Spitalin Fushor të Emirateve në Rafah pasi objekti u bë përsëri i arritshëm pas muajsh kufizimesh, raporton Anadolu.
Duke folur për gazetarët në Gjenevë, përfaqësuesi i OBSH-së në territorin e pushtuar palestinez, Richard Peeperkorn tha: "OBSH-ja lehtësoi referimin dhe transferimin e pacientit të parë në Spitalin Fushor të Emirateve në Rafah javën e kaluar, i cili deri vonë kishte qenë i paarritshëm pas pushtimit të Rafahut në vitin 2024".
Ai tha se spitali është aktualisht e vetmja qendër mjekësore funksionale që i shërben zonës së Rafahut, pjesë të mëdha të së cilës ndodhen jashtë vijës së armëpushimit. Peeperkorn tha se OBSH-ja do të vazhdojë të mbështesë referime të mëtejshme për të "siguruar që pacientët të kenë akses në kujdes të specializuar, përfshirë kirurgjinë ortopedike dhe plastike".
- 1.092 persona vdiqën ndërsa prisnin për evakuim mjekësor
Që nga tetori i vitit 2023, gjithsej 10.645 pacientë janë evakuuar nga Gaza, përfshirë 5.632 fëmijë, që përfaqësojnë 53 për qind të të gjitha evakuimeve, sipas shifrave të OBSH-së.
Të dhënat e Ministrisë së Shëndetësisë tregojnë se 1.092 pacientë vdiqën ndërsa prisnin evakuimin mjekësor midis korrikut 2024 dhe 28 nëntorit 2025, megjithëse OBSH-ja vuri në dukje se shifra ka të ngjarë të jetë "e nën-raportuar" sepse pasqyron vetëm vdekjet e dokumentuara.
"Mbi 18.500 pacientë, përfshirë 4.096 fëmijë, ende kanë nevojë për evakuim nga Gaza", tha Peeperkorn. Ai shtoi se OBSH-ja u bën thirrje më shumë vendeve të pranojnë pacientë dhe që evakuimet mjekësore në Bregun Perëndimor, përfshirë Kudsin Lindor, të rivendosen.
