Ahmed Asmar
31 Janar 2025•Përditësim: 01 Shkurt 2025
Kostoja e luftës së Izraelit në Gaza ka arritur në 42 miliardë dollarë, me një mesatare ditore prej 83,8 milionë dollarë, transmeton Anadolu.
Gazeta izraelite Yedioth Ahronoth raportoi se nga mesi i janarit, lufta kishte kushtuar 150 miliardë shekelë, apo rreth 42 miliardë dollarë, duke cituar Gil Pinchas, këshilltar ekonomik i shefit të shtabit të ushtrisë izraelite dhe kreu i Departamentit të Buxhetit në Ministrinë e Mbrojtjes.
Gazeta tha se kostoja mesatare ditore e luftës në Gaza ishte afërsisht 300 milionë shekelë, apo rreth 83,8 milionë dollarë.
Ai gjithashtu vuri në dukje se "një natë e vetme e mbrojtjes së qiellit të Izraelit me ndihmën e koalicionit ndërkombëtar kundër sulmit raketor iranian na kushtoi 1 miliard shekelë, apo rreth 280 milionë dollarë.
Më 1 tetor të vitit të kaluar, Irani lëshoi rreth 180 raketa balistike mbi Izraelin, në atë që Teherani tha se ishte një hakmarrje për vrasjet e fundit të udhëheqësve të Hezbollahut dhe Hamasit, si dhe një komandanti të Gardës Revolucionare.
Yedioth Ahronoth shtoi se "shpenzimet më të mëdha në buxhetin e mbrojtjes kanë të bëjnë me financimin e ushtrisë rezervë, që arriti në 45 miliardë shekelë, apo rreth 12,5.
Më 19 janar hyri në fuqi marrëveshja e armëpushimit dhe shkëmbimit të të burgosurve ndërmjet Hamasit dhe Izraelit, që fillimisht është paraparë të zgjasë 42 ditë, gjatë së cilës negociatat do të vazhdojnë për fazat pasuese të marrëveshjes. Marrëveshja ndërmjetësohet nga Egjipti dhe Katari, me mbështetjen e SHBA-së.
Lufta gjenocidale e Izraelit ka vrarë më shumë se 47.400 palestinezë, shumica prej tyre gra dhe fëmijë, dhe ka plagosur më shumë se 111.000 që nga 7 tetori 2023.
Lufta gjenocidale e Izraelit në Gaza ka lënë më shumë se 11,000 njerëz të zhdukur, me shkatërrim të gjerë dhe një krizë humanitare që ka shkaktuar vdekjen e shumë të moshuarve dhe fëmijëve, në një nga fatkeqësitë më të këqija humanitare globale.
Gjykata Ndërkombëtare Penale lëshoi urdhrarreste në nëntor të vitit të kaluar për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në Gaza.
