Koreja e Jugut e cilëson si të "paligjshëm" bashkëpunimin Kore e Veriut-Rusi

Presidenti i Koresë së Jugut, Yoon Suk Yeol e cilësoi bashkëpunimin mes Koresë së Veriut dhe Rusisë si "të paligjshëm" dhe deklaroi se do të shqyrtojnë skenarët e mundshëm për "kundërmasa", transmeton Anadolu.

Sipas lajmit të Yonhap, kryeministri Han Duck-soo lexoi deklaratën e Yoon në parlament.

"Situata e fundit e sigurisë ndërkombëtare dhe bashkëpunimi i paligjshëm ushtarak midis Koresë së Veriut dhe Rusisë përbëjnë kërcënim të rëndësishëm për sigurinë tonë kombëtare", tha Yoon.

Ai shtoi se do të shqyrtojnë në mënyrë gjithëpërfshirëse të gjithë skenarët e mundshëm për të përgatitur "kundërmasat" për këtë bashkëpunim. Yoon vuri në dukje se falë bashkëpunimit trepalësh të sigurisë që përfshin SHBA-në dhe Japoninë, ata kanë forcuar ndjeshëm masat parandaluese të vendit ndaj kërcënimeve bërthamore të Koresë së Veriut.

"Ne do të punojmë për të zgjeruar mirëkuptimin dhe mbështetjen e komunitetit ndërkombëtar për vizionin e një Koreje të lirë dhe të bashkuar", tha Yoon.

- Bashkëpunimi Kore e Veriut-Rusi

Presidenti rus Vladimir Putin zhvilloi vizitë zyrtare në Korenë e Veriut në qershor dhe nënshkroi "marrëveshjen gjithëpërfshirëse të partneritetit strategjik" midis palëve.

Presidenti ukrainas Volodymyr Zelenskyy në deklaratën e tij më 25 tetor njoftoi se ata kishin mësuar se Rusia do të vendoste ushtarë të Koresë së Veriut në zonat e para luftarake më 27-28 tetor.

SHBA-ja ka njoftuar se në Rusi ndodhen rreth 10 mijë ushtarë të Koresë së Veriut dhe se 8 mijë prej tyre ishin dislokuar në rajonin e Kurskut afër kufirit me Ukrainën.