Një klerik që jeton në të njëjtën rezidencë me Papa Françeskun ka rezultuar pozitiv me koronavirus, njoftuan sot mediat lokale, transmeton Anadolu Agency (AA).

Ai jeton prej vitesh në shtëpinë e mysafirëve në Shën Marta, ngjitur me Shën Pjetrin në qytetin e Vatikanit, që ndodhet brenda Romës, ku Papa Françesku jeton që kur mori detyrën në vitin 2013, tha e përditshmja italiane "Il Messaggero".

Sipas "Il Messaggero", në këtë vend është bërë një dezinfektim i përgjithshëm.

Zëdhënësit e Vatikanit ende nuk e kanë konfirmuar rastin.

Koronavirusi i ri, i cili për herë të parë shpërtheu dhjetorin e kaluar në qytetin kinez Wuhan është përhapur në më shumë se 170 vende dhe territore. Organizata Botërore e Shëndetësisë shpërthimin e koronavirusit e ka shpallur pandemi.

Më shumë se 472 mijë njerëz janë infektuar nga lloji i ri i koronavirusit në botë, ndërsa 21.300 kanë vdekur si rezultat i infeksionit. Më shumë se 114.800 janë shëruar, njofton Universiteti amerikan "Johns Hopkins".