Ata Ufuk Şeker
31 Dhjetor 2017•Përditësim: 01 Janar 2018
BRUKSEL (AA) – Ish-presidenti i rajonit spanjoll të Katalonjës, Carles Puigdemont i bëri thirrje Qeverisë së Spanjës që të njohin rezultatet e zgjedhjeve të fundit dhe të nisin dialogun, raporton Anadolu Agency (AA).
Puigdemont nëpërmjet rrjeteve sociale ka thënë se "Si president kërkon që t'i kthehen të gjitha ato të cilat Qeveria e Spanjës dhe mbështetësit e saj konfiskuan në mënyrë të paligjshme nga katalonjasit".
Më tej shtoi se ai është udhëheqësi legjitim i Katalonjës dhe ftoi kryeministrin e Spanjës Mariano Rajoy në dialog politik për të zgjidhur krizën.
Ai theksoi se në zgjedhje të gjithë kishin mundësinë të shprehnin opinionin e tyre.
"Çfarë pret ende Rajoy që të pranojë rezultatet?" pyeti Puigdemont.
Qytetarët e rajonit autonom të Katalonjës më 21 dhjetor iu drejtuan kutive të votimit në zgjedhjet e parakohshme, të shpalluara nga autoritetet qendrore spanjolle pasi që në fund të tetorit morën kontrollin e Katalonjës.
Koalicioni "Së bashku për Katalonjën", i përbërë nga Partia Demokratike Evropiane (PDeCAT) dhe Konvergjenca Demokratike e Katalonjës (CDC), fitoi 34 vende (21.65 për qind), E majta Republikane e Katalonjës (ERC) 32 vende (21.39 për qind) dhe Kandidatura Anti-kapitaliste e Unitetit Kombëtar (CUP) mori 4 vende (4.45 për qind).
Partitë separatiste, edhe pse fituan më pak se 50 për qind të votave, për shkak të sistemit zgjedhor kanë siguruar 70 vende, kurse minimumi për formimin e Qeverisë është 68. Fitorja në zgjedhje sërish ka hapur rrugën që Puigdemont të jetë president i Katalonjës.
