Ekip
18 Dhjetor 2020•Përditësim: 19 Dhjetor 2020
Irani ka përjashtuar mundësinë për ri-negociata ose një marrëveshjeje të re për programin bërthamor të vendit, duke refuzuar propozimin e shefit të mbikëqyrësit atomik të Kombeve të Bashkuara (OKB) se rigjallërimi i marrëveshjes do të kërkonte një dokument të ri, transmeton Anadolu Agency (AA).
I dërguari i Iranit në organizatën me qendër në Vjenë, Kazem Gharibabadi, tha se paraqitja e ndonjë vlerësimi se si zbatohen angazhimet e marrëveshjes bërthamore është "përtej mandatit" të agjencisë së OKB-së.
"Siç thashë më parë, roli i vetëm i IAEA-së është të monitorojë dhe verifikojë masat vullnetare të lidhura me marrëveshjen bërthamore, siç detajohen në JCPOA (marrëveshja bërthamore) dhe të sigurojë azhurnime të rregullta faktike", tha Gharibabadi.
Gharibabadi tha se "zotimet" e palëve në marrëveshje dhe agjencia bërthamore e OKB-së janë "hartuar me delikatesë" dhe se secila palë i di mënyrat e zbatimit të saj.
"Nuk do të ketë ri-negocim për marrëveshjen dhe në rast të rigjallërimit të saj, nuk ka nevojë për një dokument të ri mbi rolin e agjencisë. Nuk është e nevojshme të komplikohet situata", tha i dërguari iranian.
Komentet e tij vijnë një ditë pasi dje shefi i Agjencisë Ndërkombëtare të Energjisë Atomike (IAEA), Rafael Grossi, tha se ka pasur "shumë shkelje" nga Irani në përgjigje të tërheqjes së SHBA-ve.
"Nuk mund ta imagjinoj se ata do të thonë thjesht 'jemi përsëri në kuadrat e para', sepse kuadrat nuk janë më atje", tha Grossi në një intervistë televizive.
Ai tha se tani në Iran ka "më shumë material bërthamor dhe më shumë centrifuga", gjë që kërkon rishqyrtimin e marrëveshjes së nënshkruar në vitin 2015 midis Iranit dhe fuqive botërore.
Në dy vitet e fundit, Irani në mënyrë të rregullt ka rritur aktivitetet bërthamore në përgjigje të tërheqjes së njëanshme të administratës së presidentit të SHBA-ve, Donald Trump, nga marrëveshja në maj të vitit 2018.
Së fundmi, parlamenti iranian miratoi legjislacionin që kërkon përshpejtimin e mëtejshëm të aktiviteteve bërthamore dhe dhënien fund të zbatimit vullnetar të Protokollit Shtesë.
Megjithatë, qeveria e udhëhequr nga Hassan Rouhani ka shprehur gatishmërinë e saj për t'u kthyer në përputhje të plotë me marrëveshjen nëse administrata e re e SHBA-ve, e udhëhequr nga Joe Biden, i kthehet marrëveshjes.
Por zyrtarët e lartë të qeverisë kanë refuzuar "ri-negociatat" e marrëveshjes, duke u bërë thirrje SHBA-ve dhe evropianëve që të kthehen në përputhje të plotë "pa parakushte".
"Ne nuk do të ri-negociojmë një marrëveshje për të cilën kemi negociuar. Marrëveshja ishte gati të jepte dhe të merrte, jo njëra palë kërkon dhe pala tjetër jep", tha në fillim të këtij muaji Javad Zarif, ministri iranian i Punëve të Jashtme.
