Iran, një deputete vdes nga koronavirusi

Një ligjvënëse iraniane ka humbur jetën nga koronavirusi, njoftuan media të shtunën, transmeton Anadolu Agency (AA).

Fatemeh Rahbar, anëtare e Partisë së Koalicionit Islamik, kishte qenë nën kujdes intensiv që nga e enjtja, sipas agjencisë gjysmë zyrtare Tasnim.

Autoritetet iraniane kanë konfirmuar 4.747 raste në gjithë vendin, përfshirë një nënkryetar, 23 deputetë të parlamentit dhe zv/ministrin e Shëndetësisë, kurse 124 njerëz kanë vdekur për shkak të virusit.

Zyrtarët iranianë aktualisht e kanë të ndaluar të udhëtojnë jashtë vendit, ndërsa parlamenti i vendit është pezulluar për një kohë të pacaktuar.

I zbuluar për herë të parë në Wuhan të Kinës në dhjetor, virusi, i njohur zyrtarisht si COVID-19, është përhapur në më shumë se 80 vende.

Sipas Organizatës Botërore të Shëndetësisë (OBSH), virusi ka marrë jetën e rreth 3.500 njerëzve globalisht, ndërsa ka infektuar 100 mijë vetë.

OBSH, e cila shpalli epideminë si një emergjencë ndërkombëtare shëndetësore, së fundmi përditësoi nivelin e rrezikut global në "shumë të lartë".