Kancelarja gjermane Angela Merkel dhe ministri i Punëve të Brendshme Horst Seehofer janë dakorduar që vendi i tyre të pranojë edhe 1.500 refugjatë nga ishujt grekë, transmeton Anadolu Agency (AA).

Mediat lokale theksojnë se bëhet fjalë për familje me fëmijë dhe se pritja tashmë është dakorduar me qeverinë greke.

Theksohet se edhe partneri tjetër qeveritar, Partia Socialdemokrate (SPD), e cila dëshiron të pranojë më shumë refugjatë, duhet të aprovojë planin e Merkel dhe Seehofer.

Rolf Mutzenich, kreu i klubit parlamentar të SPD-së, tha se nuk e dinte numrin dhe se qeverinë nuk e përbën kancelarja dhe ministri i Brendshëm.

"Një kompromis midis qeverisë është i vlefshëm, jo ​​kompromisi i tyre", tha ai.

Kryeministri i Bavarisë, Markus Soder, e mirëpriti këtë plan, duke deklaruar se në këtë mënyrë, Gjermania do të përmbushë detyrimin e saj për të ndihmuar refugjatët.

Seehofer njoftoi disa ditë më parë se pas zjarrit në kampin e refugjatëve Moria në ishullin grek Lesbos, në këtë vend do të zhvendosen mes 100 dhe 150 nga 400 fëmijë pa shoqërim që gjendeshin në kamp.

Në kampin Moria janë vendosur rreth 12.500 migrantë, ndërsa pas zjarrit të javës së kaluar mijëra persona mbetën pa kulm mbi kokë.