Forumi i Dohas 2025 fillon në kryeqytetin e Katarit

Edicioni i 23-të i Forumit të Dohas ka filluar në kryeqytetin e Katarit nën temën “Drejtësia në veprim: Përtej premtimeve për progres”, raporton Anadolu.

Duke folur në seancën e hapjes, kryeministri i Katarit, Sheikh Mohammed bin Abdulrahman Al Thani, tha se bota po dëshmon “pengesa serioze” në drejtësi, sundimin e ligjit dhe llogaridhënie.

“Në shumë raste drejtësia është bërë e padukshme në rrugën e së drejtës ndërkombëtare”, tha Sheikh Mohammed, duke shtuar se mekanizmat e dobësuar ligjor kanë thelluar krizat globale.

Sheikh Mohammed, i cili gjithashtu është ministër i jashtëm, tha se konfliktet dhe emergjencat humanitare të sotme janë të rrënjosura në një “kulturë të pandëshkueshmërisë”, duke e vendosur botën “në një cikël të paparë krizash”.

Ai tha se Katari e konsideron ndërmjetësimin jo si një opsion diplomatik, por si një politikë thelbësore shtetërore.

“Ndërmjetësimi për ne nuk është një luks politik, por një metodë e rrënjosur thellë dhe e qëndrueshme”, tha ai.

Ai bëri thirrje për rivendosjen e besimit në rendin ligjor ndërkombëtar, duke theksuar se bota ka nevojë për një sistem të drejtë.

Sfidat rajonale, shtoi ai, nuk mund të ndahen nga rënia globale e respektimit të normave ndërkombëtare.

Ngjarja 2-ditore bashkon liderë global, përfshirë presidentin sirian, Ahmad al-Sharaa, ministrin turk të Punëve të Jashtme, Hakan Fidan, kryediplomatin spanjoll, Jose Manuel Albares, presidentin dhe shefin ekzekutiv të Forumit Ekonomik Botërore, Borge Brende, ish-sekretaren e Shtetit të SHBA-së, Hillary Clinton dhe ish-shefin ekzekutiv të kompanisë Microsoft, Bill Gates.

Anadolu është partneri global i komunikimit i ngjarjes.

Programi i vitit 2025, i zhvilluar me grupe ekspertësh dhe institucione kërkimore globale, përmban seanca si “Llogaridhënie për Gazën: Ri-rregullimi i përgjegjësive globale dhe rrugëve drejt paqes”, “Marrëdhëniet midis Gjirit dhe BE-së në epokën e izolimit strategjik”, “Inteligjenca artificiale si shpatë me dy tehe: Strategjia për përdorim të përgjegjshëm në fushën ushtarake” dhe “Marrëdhëniet SHBA-Kinë: Lundrimi në rreziqet dhe mundësitë e një rendi global në ndryshim”.

Edicioni më i fundit i forumit, i mbajtur në dhjetor të vitit 2024, nën temën “Imperativi i inovacionit”, mirëpriti më shumë se 5 mijë pjesëmarrës, përfshirë mbi 350 folës.