BE: Gratë të nënpërfaqësuara në pozita drejtuese

Zyra statistikore evropiane Eurostat ka bërë të ditur se gratë në Bashkimin Evropian (BE) vazhdojnë të jenë të nënpërfaqësuara në pozitat drejtuese, edhe pse ato afërsisht janë gjysma e punësimit total, transmeton Anadolu Agency (AA).

Eurostat theksoi se afërsisht 9.4 milionë punonjës mbajnë pozitën drejtuese që nga viti 2017 dhe rreth një e treta e menaxherëve janë gra.

“Kjo pjesë mbeti e njëjtë që nga viti 2012”, tha Eurostat me rastin e 8 Marsit, Ditës ndërkombëtare të gruas.

Pjesa më e madhe e grave midis pozicioneve drejtuese u regjistrua në Letoni me 56 për qind, i vetmi vend anëtar i BE-së ku gratë tejkaluan burrat në pozitat drejtuese.

Shifrat zyrtare treguan se numri më i ulët u regjistrua në Luksemburg, ku gratë përbëjnë vetëm 15 për qind në pozitat drejtuese.

Eurostat po ashtu theksoi se proporcioni i grave midis drejtuesve të lartë vitin e kaluar ishte vetëm 17 për qind.