Andres Iniesta do të largohet nga klubi japonez Vissel Kobe

Futbollisti spanjoll, Andres Iniesta, i cili luan për skuadrën e ligës së parë japoneze, Vissel Kobe, ka njoftuar largimin e tij nga klubi deri në fund të sezonit, raporton Anadolu.

Iniesta gjatë një konference për media në qytetin Kobe deklaroi se ndeshjen e fundit me fanellën e këtij klubi do ta luajë më 1 korrik, kundër Consadole Sapporo.

"Ndjej se prioritetet e trajnerit kanë ndryshuar. Në përputhje me këtë realitet dhe pasionin tim për të luajtur, vendosa që largimi nga ekipi të ishte zgjidhja më e mirë", tha Iniesta.

Duke theksuar se fanellën e Vissel Kobe e ka mbajtur me shumë krenari dhe gëzim, futbollisti spanjoll tha: “Lamtumirat janë një nga vendimet më të vështira në jetën time profesionale".

Pasi fitoi nëntë tituj të ligës dhe katër tituj të Ligës së Kampionëve me Barcelonën, Iniesta u transferua te Vissel Kobe në vitin 2018, me të cilën rinovoi kontratën e tij dyvjeçare në 2021.

Gjatë epokës së Iniestës, Vissel Kobe konkurroi në Ligën e Kampionëve të Konfederatës së Futbollit Aziatik (AFC) për herë të parë vitin e kaluar dhe fitoi Kupën e Perandorit të Japonisë 2019 dhe Superkupën e Japonisë 2020.

Gjatë karrierës së tij, Iniesta mori pjesë në katër Kupa Botërore me Spanjën dhe ngriti trofeun e FIFA-s në vitin 2010 në Afrikën e Jugut.