Agim Sulaj
13 Nëntor 2020•Përditësim: 14 Nëntor 2020
Kryeministri i Kosovës, Avdullah Hoti, së bashku me ministrin e Ekonomisë dhe Ambientit, Blerim Kuçi, zëvendësministrin e Financave, Agim Krasniqi si dhe përfaqësuesit e Bordit të Përkohshëm të “Trepçës”, mbajti një konferencë për media, në të cilën bëri të ditur ndarjen e 1.1 milionë eurove për ndërmarrjen “Trepça”, transmeton Anadolu Agency (AA).
Hoti tha se situata në ndërmarrjen “Trepça” është shumë e vështirë, për shkak të pandemisë, për shkak të pamundësisë që ajo t’i shesë produktet e saj në tregjet botërore si shkak të rënies së çmimeve si dhe për arsye të “menaxhimit joadekuat dhe joefikas”.
Ai theksoi se Qeveria çdo vit e subvencionon Trepçën me nga rreth 7 milionë, por pavarësisht kësaj është dashur një mbështetje shtesë për shkak të gjendjes jo të mirë ku kompania ka aktualisht rreth 8 milionë euro borxhe.
“Qeveria do të ndajë 1.1 milionë euro për ndërmarrjen 'Trepça' për të tejkaluar situatën nëpër të cilën po kalon. Bordi do të ofrojë garancat e veta përmes planit të biznesit që duhet të dorëzohet shpejt në Ministrinë e Ekonomisë dhe Ambientit për mënyrën e menaxhimit të kompanisë në të ardhmen dhe në këtë plan biznesi do të jenë veprimet konkrete që do të ndërmerren nga Bordi i Përkohshëm i kompanisë karshi menaxhmentit të kompanisë për t’u siguruar që kompania nuk vjen prapë në këtë situatë”, ka thënë Hoti.
Kryeministri tha se beson që kjo ndihmë do të mundësojë tejkalimin e krizës dhe mospërsëritjen e gjendjes së rëndë.
“Në plot ndërmarrje të tjera kemi probleme pak a shumë të ngjashme, po për shkak të specifikave që ka ndërmarrja 'Trepça', me insistimin e ministrit e kemi trajtuar pak më ndryshe këtë çështje dhe bashkë me ministrin e Financave besoj që është gjetur zgjidhja më e mirë e mundshme në rrethanat në të cilat jemi”, shtoi Hoti.
Gjatë këtij viti, kryeshefi aktual i kësaj ndërmarrje, Hysen Vrajolli, ka thënë se në Trepçë “ka pasur rritje të prodhimit për rreth 30 për qind krahasuar me vitin e kaluar, por rënia e çmimeve në bursa dhe tregje ndërkombëtare e ka nxjerrë këtë kompani me afarizëm negativ”.
"Trepça" e cila merret me nxjerrjen e mineraleve dhe kristaleve të ndryshme në Kosovë përfshirë plumbin, zinkun dhe argjendin gjendet në Komunën e Mitrovicës, ku sektorët e saj shtrihen në pjesën e veriut dhe në atë të jugut të këtij qyteti.
