Presidenti Thaçi merr pjesë në Samitin e Kartës së Adriatikut në Podgoricë

PODGORICË (AA) - Presidenti i Republikës së Kosovës, Hashim Thaçi, mori pjesë sot në Samitin e Kartës së Adriatikut ‘US-Adriatic Charter’ (A5) në Podgoricë, i cili kësaj radhe bashkë-organizohet nga Mali i Zi dhe Republika e Maqedonisë, transmeton Anadolu Agency (AA).

Presidenti Thaçi tha se Samiti i Kartës së Adriatikut, ‘US-Adriatic Charter’ (A5), këtë vit është shumë i veçantë. “Pjesëmarrja e zëvendëspresidentit amerikan, Mike Pence, vetëm pak muaj pas anëtarësimit të Malit të Zi në NATO, është dëshmia më e mirë se anëtarësimi i Kosovës dhe shteteve tjera aspiruese në NATO, do të jetësohet”, thuhet në një komunikatë nga Zyra e Presidentit.

Para fillimit të këtij Samiti, Presidenti Thaçi, zhvilloi takim bilateral me kryeministrin e Malit të Zi, Dushko Markoviç, me të cilin u pajtuan për thellimin e bashkëpunimit politik, ekonomik, tregtar, kulturor dhe arsimor.

Me këtë rast, presidenti Thaçi tha se anëtarësimi i Malit të Zi në NATO, ka krijuar një momentum të ri në përshpejtimin e procesit të anëtarësimit edhe të shteteve tjera të Ballkanit në NATO.

Po ashtu, gjatë ditës së sotme në kuadër të Samitit të Kartës së Adriatikut ‘US-Adriatic Charter’ (A5), presidenti Thaçi, do të zhvillojë një takim bilateral me zëvendespresidentin e SHBA-së, Mike Pence.