Ali Kemal Akan
15 Декември 2020•Ажурирај: 16 Декември 2020
АНКАРА (АА) - Претседателот на Одбранбените индустрии на Турција, Исмаил Демир, во врска со одлуката на Соединетите Американски Држави (САД) за санкции рече дека тоа е настан што треба да остане ограничен, и дека не очекува да влијае многу на меѓусебните односи, јавува Агенција Анадолија (АА).
Демир, кој пристигна во турскиот Парламент за да учествува на дебатата за буџетот за 2021 година, одговараше на новинарските прашања во врска со санкциите на САД кон Турција.
„Ние сме решени и ќе продолжиме“, изјави Демир, потсетувајќи на претходните изјави во врска со оваа тема.
„Ние сме сојузници во НАТО. Како што кажаа и самите, во многу области имаат соработка со Турција. И тие, и ние, очекуваме таа соработка да продолжи. Ова е настан што треба да остане ограничен. Очекуваме да не влијае многу на нашите односи. Ние во нашето опкружување ќе најдеме решение за тоа. Од наша гледна точка, развојот на домашната индустрија ќе продолжи, можеби ќе продолжи и побрзо. Во некоја смисла ова е еден вид предупредување“, нагласи Исмаил Демир.
Американското Министерство за финансии воведе санкции за Турција поради набавката на рускиот ракетен систем за противвоздушна одбрана С-400.
Санкциите, кои се дел од Законот за сузбивање на американските противници со санкции (CAATSA), се насочени кон Одбранбените индустрии на Турција (SSB), нивниот челник Исмаил Демир и уште тројца официјални лица.
Американскиот државен секретар Мајк Помпео преку соопштение истакна дека Одбранбените индустрии на Турција (SSB) свесно учествувале во значајна трансакција со „Рособоронекспорт“, главната руска агенција за извоз на оружје, за набавка на ракетниот систем С-400.
„Санкциите вклучуваат забрана на сите американски дозволи за извоз и овластувања за ССБ и замрзнување на имотот и ограничувања по прашање на визите за д-р Исмаил Демир, претседателот на ССБ и други службеници на ССБ“, додаде Помпео.
