Seda Sevencan
01 Октомври 2021•Ажурирај: 02 Октомври 2021
ИСТАНБУЛ (АА) - Турција денеска ја осуди изјавата на Грција во врска со поморската јурисдикција во однос на Договорот за одбрана меѓу Грција и Франција, јавува Агенција Анадолија (АА).
Во пишаното соопштение, Тању Билгич, портпаролот на турското Министерство за надворешни работи, изјави „Тврдењата на Грција за максималистичка поморска јурисдикција и воздушен простор се спротивни на меѓународното право.“
„Залудна е надежта дека Грција може да нѐ натера да ги прифатиме овие тврдења, кои, исто така, ги доведува во прашање и меѓународната заедница, со формирање билатерални воени сојузи против Турција, на начин што ќе наштети на НАТО-алијансата“, рече Билгич.
Претходно, грчкиот министер за одбрана, Николаос Панагиотопулос, рече дека грчко-францускиот Договор за одбрана опфаќа и поморска јурисдикција.
„Ваквите залудни напори дополнително ќе ја зголемат нашата решеност да ги заштитиме и нашите сопствени права и правата на Турската Република Северен Кипар (ТРСК) на Егејското Море и Медитеранот“, изјави Билгич.
Тој, исто така, рече дека грчката политика за вооружување и изолација на Турција е проблематична, бидејќи ќе наштети и на самата себе и на ЕУ и ќе го загрози регионалниот мир и стабилност.
Грција во вторникот потпиша договор за купување на три воени брода од Франција и зајакнување на безбедносната соработка меѓу двете земји, потег што двете страни го поздравија како чекор кон европската стратешка автономија.
Договорот е постигнат помалку од две недели откако Франција беше исклучена од новиот индопацифички одбранбен пакт меѓу САД, Велика Британија и Австралија.
Договорот беше официјализиран само еден ден откако грчкиот премиер Кирјакос Мицотакис рече дека Грција сака да ја избегне трката за вооружување со Турција и да ги смири тензиите со Анкара во Источниот Медитеран.
