Турција: Ердоган претседава со седница на безбедносниот совет за руската воена интервенција во Украина

АНКАРА (АА) ‒ Во Претседателската палата во Анкара започна седница на безбедносниот совет во врска со руската воена интервенција во Украина, со која претседава турскиот претседател Реџеп Таип Ердоган, јавува Агенција Анадолија (АА).

На Самитот присуствуваат потпретседателот Фуат Октај, министерот за одбрана, Хулуси Акар, министерот за внатрешни работи, Сулејман Сојлу, началникот на Генералштабот, генерал Јашар Ѓулер, шефот на Националната разузнавачка организација, Хакан Фидан, шефот на Дирекцијата за комуникации, Фахретин Алтун и портпаролот на претседателот, Ибрахим Калин.

Самитот се одржува во Претседателскиот комплекс.

Министерот за надворешни работи, Мевлут Чавушоглу, не беше во можност да присуствува поради неговата актуелна посета на Казахстан.

Рускиот претседател Владимир Путин утринава објави воена интервенција во Украина само неколку дена откако призна две енклави под контрола на сепаратистите во источна Украина. Признавањето наиде на меѓународна осуда и најави за построги санкции кон Москва.

Имаше извештаи за експлозии во неколку украински области, вклучувајќи го и главниот град Киев, а воени возила наводно ја преминале границата од Белорусија во Украина.

Во последните месеци Русија распореди над 100.000 руски војници околу Украина, но постојано негираше каква било намера за инвазија.