Esra Tekin
28 Октомври 2023•Ажурирај: 29 Октомври 2023
ИСТАНБУЛ (АА) - Турскиот претседател Реџеп Таип Ердоган денес го повика Израел да ги запре нападите врз Газа и да излезе од неговата состојба на лудилo, по интензивирањето на израелските операции во текот на ноќта, јавува Анадолу.
„Континуирано зголемените и засилени израелски бомбардирања кон Газа повторно ги таргетираа жените, децата и невините цивили, продлабочувајќи ја постоечката хуманитарна криза“, истакна Ердоган преку платформата X.
Ердоган побара од турскиот народ да се приклучи на „Големиот митинг за Палестина“, кој ќе се одржи на аеродромот „Ататурк“ попладнево за да им покаже поддршка на Палестинците. Се очекува турскиот претседател да се обрати на собирот.
Конфликтот започна на 7 октомври кога палестинската група Хамас ја почна операцијата „Поплава Ал Акса“ - ненадеен повеќестран напад со бараж ракети и инфилтрирање во Израел преку копно, море и воздух. Хамас истакна дека операцијата е одмазда за упадите во џамијата Ал Акса и зголеменото насилство од страна на еврејските доселеници врз Палестинците.
Израелската војска потоа започна немилосрдно бомбардирање на позиции на Хамас во Појасот Газа. Кампањата се интензивира синоќа, откако војската соопшти дека ги проширува операциите на воздушните и копнените операции на територијата. Исто така, го прекина интернетот и комуникациите во енклавата под опсада.
Најмалку 7.326 Палестинци загинаа во израелските напади. Според официјалните податоци, околу 70 отсто од палестинските жртви се жени и деца.
Бројот на загинати во Израел изнесува над 1.400.
2,3 милиони жители на Газа се борат со недостиг на храна, вода и лекови поради масовното воздушно бомбардирање на Израел и целосната блокада на енклавата.
Генералното собрание на ОН доцна синоќа усвои резолуција со која се повикува на хуманитарно примирје, но министерот за надворешни работи на Израел, Ели Коен, ја нарече „презирна“ и ја отфрли.
