Сообраќајна несреќа во Туркије: 16 загинати, 21 повреден

Во сообраќајна несреќа што се случи во турската југоисточна област Газиантеп, загинаа 16, а повредени се 21 лице, соопштија властите, пренесува Агенција Анадолија (АА).

Додека тимот на пожарникари и медицинската служба интервенирале по сообраќајната несреќа на автопатот Тарсус - Адана - Газиантеп, патнички автобус што се превртил и се влечел десетици метри, удрил во пожарникарите и во возилото на турската новинска агенција ИХА.

Меѓу загинатите се наоѓаат и тројца пожарникари, четворица членови на медицинскиот персонал и новинарите на ИХА, Мухамед Абдулкадир Есен и Умут Јакуп Танриовер.

Гувернерот на Газиантеп, Давут Ѓул, во изјава за медиумите истакна дека првата сообраќајна несреќа се случила околу 10:45 часот наутро.

Сите повредени се пренесени во болница.