Orhan Onur Gemici
23 Април 2021•Ажурирај: 25 Април 2021
АНКАРА
Денеска од Интерпол е распишана црвена потерница за Фатих Фарук Озер, сопственикот на берзата на криптовалути „Тодекс“, кој во вторникот побегна од Турција во Албанија и се сомничи дека измамил околу 400.000 лица, јавува Агенција Анадолија (АА).
Новинарот на АА дознава дека министерот за внатрешни работи на Турција, Сулејман Сојлу, разговарал на оваа тема со албанскиот колега Бледар Чучи. Разговараа исто така и шефовите на полицијата на двете земји.
Откако во медиумите е објавено дека Озер (27) побегнал во странство, а пред тоа ги измамил своите вложувачи, Републиканското обвинителство во Истанбул вчера започна истрага.
За Озер, според пишувањата на медиумите, постои сомнеж дека преку криптовалути измамил околу 400.000 лица и дека станува збор за измама од дури две милијарди долари.
Судот во Истанбул распиша потерница по Озер поради кривично дело „формирање организација за правење измами и криминал со користење на информациски системи, банки или кредитни институции“. По налог на Државното обвинителство е извршен претрес на работното место на осомничениот и се преземени мерки над неговите банкарски сметки.
Откако Републиканското обвинителство во Истанбул синоќа упати барање кон турската полиција за распишување црвена потерница по Озер, утврдено е дека Интерпол денеска претпладне распишал црвена потерница и се очекува негово апсење и испорачување на Турција.
Министерството за внатрешни работи на Турција претходно потврди дека осомничениот Озер во вторникот на 20 април ја напуштил Турција и дека од Аеродромот „Истанбул“ одлетал за Тирана.
До Републичкото обвинителство во Истанбул вчера е поднесена кривична пријава, а подоцна е започната и истрага против Фатих Фарук Озер, сопственикот на „Тодекс“, берза на криптовалути основана во 2017 година во Турција. Во пријавата се наведува дека на берзата веќе седум дена постои проблем со повлекување на пари на банкарските сметки и дека подоцна дошло до потполно затворање на берзата.
Се наведува, исто така, дека и веб-страницата „www.thodex.com“ не е достапна веќе два дена. Станува збор за страница која има околу 400.000 корисници, меѓу кои 390.000 корисници кои активно ја спроведуваат трговијата со криптовалути и финансираат вложувања.
Голем број корисници на „Тодекс“ се огласија преку социјалните мрежи наведувајќи дека немаат пристап на берзата и дека веќе некое време не се во можност да ги пренесат своите пари на сметките.
По жалбите на корисниците дека не можат да пристапат на парите на берзата, компанијата се огласи пред два дена со образложение дека „сите проблеми ќе бидат решени по шесте часа на планирано одржување“. Потоа, од берзата повторно се огласија наведувајќи дека овој пат работите на одржување ќе траат 4-5 дена.
