Разговор Ердоган - Путин: Туркије е подготвена да развие соработка со Русија во борбата против тероризмот

ИСТАНБУЛ (АА) - Претседателот на Туркије, Реџеп Тајип Ердоган, вчера телефонски разговараше со рускиот претседател Владимир Путин, известува Анадолу.

Ердоган му изразил длабока тага и сочувство на Путин поради терористичкиот напад во Москва, се вели во соопштението на Дирекцијата за комуникации на Кабинетот на турскиот претседател.

Најостро осудувајќи го грозоморниот терористички напад што подло беше насочен кон невини луѓе и изразувајќи сочувство, претседателот Ердоган истакнал дека нападот ја покажува потребата што поскоро на мирен начин да им се стави крај на кризите во регионот.

Ердоган рекол дека Турција е подготвена да развие соработка со Русија во борбата против тероризмот, што подразбира борба против сите видови тероризам.

Терористичкиот напад го извршија вооружени напаѓачи вечерта на 22 март во концертната сала „Крокус сити хол“ во Москва.

Во нападот се убиени најмалку 137 лица. Снимките споделени на социјалните мрежи покажуваат како напаѓачите со автоматско оружје пукаат по случаен избор во салата.

Подоцна настанала и експлозија која предизвикала голем пожар, поради што се урнал кровот на зградата.

Откажани се сите јавни настани во Москва за време на викендот, а формирана е и работна група задолжена за терористички напад.

Кремљ објави дека директорот на руската Федерална служба за безбедност (ФСБ) Александар Бортников го информирал рускиот претседател Владимир Путин дека се уапсени 11 лица, меѓу кои и четворицата терористи кои директно учествувале во терористичкиот напад во Москва.