Ердоган: Многу е важно Газа да остане земја на палестинскиот народ, со неа да управуваат Палестинците

АНКАРА (АА) - Турскиот претседател Реџеп Таип Ердоган денес изјави дека е важно Газа да остане земја на палестинскиот народ, и со енклавата да управуваат Палестинците, јавува Анадолу,

Зборувајќи со новинарите при враќањето од Азербејџан, каде што присуствуваше на самитот на Организацијата на туркиски држави, Ердоган рече дека за време на неговата неодамнешна посета на Соединетите Американски Држави (САД) и во телефонскиот разговор со претседателот Доналд Трамп објаснил како може да се постигне решение за Палестина.

Во врска со планот на американскиот претседател за прекин на огнот во Газа, Ердоган рече: „Трамп конкретно нè замоли да разговараме со Хамас и да го убедиме, а ние веднаш стапивме во контакт со нашите соговорници по ова прашање“.

„Хамас ни кажа во својот одговор дека е подготвен за мир и преговори. Според мене, ова е многу вреден чекор“, додаде тој.

Коментирајќи за Глобалната флотила „Сумуд“, која беше нападната од Израел минатата недела, Ердоган рече дека Турција внимателно го следела процесот со беспилотни летала и бродови. Турскиот претседател рече дека лично ги следел движењата на мисијата за помош преку снимки од беспилотните летала „Акинџи“.

Ердоган нагласи дека безбедноста во Газа и воспоставувањето сили за стабилизација можат да се евалуираат и дека тој придава големо значење на тековните преговори за прекин на огнот во Шарм ел-Шеик, Египет.

Осврнувајќи се на Сирија, турскиот претседател рече: „Сириските демократски сили мора да го одржат своето ветување и да ја завршат својата интеграција со Сирија“.

„Турско-курдско-арапскиот сојуз е клучен за траен мир и спокојство во регионот“, додаде тој.