„Туркиш ерлајнс“ склучи договор со „Џи-и ероспејс“ за набавка на мотори за авионите „Боинг“

ИСTАНБУЛ (АА) – Националниот авиопревозник на Турција, „Туркиш ерлајнс“, денес објави дека постигнал договор со американската компанија „Џи-и ероспејс“ (GE Aerospace) за набавка на мотори и резервни делови за авионите „Боинг“, во рамки на договорот објавен во септември.

„Во согласност со нашите цели за раст наведени во стратегискиот план, кој има за цел да создаде значителна вредност за сите засегнати страни, Управниот одбор донесе одлука за набавка на вкупно 75 авиони ‘Боинг’, од кои 50 се потврдени нарачки, а 25 се опционални, за моделите B787-9 и B787-10, со испорака планирана во периодот од 2029 до 2034 година“, се наведува во соопштението објавено на Платформата за јавно обелоденување (KAP).

Авиокомпанијата додаде дека, како резултат на тендерот за набавка на мотори, резервни мотори и услуги за нивно одржување, преговорите се завршени и е постигнат договор со „Џи-и ероспејс“.

Во септември, „Туркиш ерлајнс“ објави дека ќе купи вкупно 225 авиони ‘Боинг’, вклучувајќи 75 авиони од моделите B787-9 и B787-10, како и 150 авиони од моделите 737-8 и 737-10 MAX.

Претходно компанијата соопшти дека води разговори со „Ролс-ројс“ и „Џи-и ероспејс“ за набавка на мотори, резервни делови и услуги за одржување за новите авиони „Боинг“.