АНКАРА
Турскиот претседател Реџеп Таип Ердоган изјави дека турското воено присуство во Катар служи на стабилноста и мирот не само на Катар, туку и на целиот Залив, јавува Агенција Анадолија (АА).
„Никој, освен оние кои прават планови за хаос, не треба да биде вознемирен од Турција и турското воено присуство во Заливот“, изјави Ердоган за време на интервјуто кое е објавено во катарскиот дневен весник „Пенинсула“ (The Peninsula), по неговата работна посета на заливската земја.
Зборувајќи со Калид Мубарак ал Шафи, главниот уредник на катарскиот весник, тој ја нарече Здружената заедничка команда на Турција и Катар „симбол на братство, пријателство, солидарност“ меѓу двете земји, додавајќи дека оние кои водат лоша пропаганда во базата не се добронамерни.
Осврнувајќи се на позицијата на Турција во Сирија, Ердоган повтори дека Турција нема аспирации кон ничија територија и не е постојана во земјата која е разорена од граѓанска војна.
„Кога кризата трајно ќе се реши, нашето присуство во Сирија ќе заврши“, рече тој.
„Со речиси 911 километри (566 милји) граница со Сирија, Турција е една од земјите кои се најмногу погодени од конфликтот што започна во 2011 година“, рече тој, истакнувајќи дека ниту една држава нема да дозволи терористичка организација да остане преку нејзините граници.
„Благодарение на напорите што ги вложуваат Турција и Слободната сириска војска, стабилноста и мирот се обновени во регионите што некогаш беа поврзани со тероризам, суровост и угнетување“, рече тој, додавајќи дека досега над 400.000 бегалци се вратиле дома.
Одговарајќи на прашањето во врска со односите меѓу Турција и САД, Ердоган рече дека Турција ќе продолжи да работи заедно со САД во сите платформи, вклучувајќи го и НАТО, за прашања како што се борбата против тероризмот, демократијата и завршувањето на конфликтите.
„Иако одвреме-навреме со САД заземавме различни ставови, големо значење даваме на непоткопувањето на стратешкото партнерство меѓу нас“, изјави Ердоган, посочувајќи ги и затегнатите односи меѓу Турција и САД поради голем број причини како што се купувањето на руските проектили С-400 од страна на Анкара и антитерористичките операции во северна Сирија против ЈПГ/ПКК, терористичка организација која САД ја поддржуваат како непријател на ДЕАШ и испорачувањето на Фетула Ѓулен во Турција, водачот на терористичката организација ФЕТО.
- „Легитимноста ќе успее во Либија“
Во врска со Либија, Ердоган рече дека Владата на национално единство е единствената легитимна структура во Либија и легитимитетот таму ќе успее, додека пучистите ќе изгубат.
„Во согласност со барањето на легитимната Влада, Турските вооружени сили вршат активности за обука и поддршка во Либија. Од друга страна, пучистот Хафтар нема ниту легитимитет ниту меѓународно признавање“, рече Ердоган.
Осврнувајќи се и на напнатоста во Медитеранот, Ердоган порача дека оние кои ја виделе одлучноста на Турција во Источниот Медитеран и сфатиле дека таа нема да оди чекор назад, морале на крајот да се согласат на дијалог.
Потсетувајќи дека на сите платформи Турција изјавувала дека нема да прифати какво било решение што ги занемарува Турција и Турската Република Северен Кипар (ТРСК), Ердоган рече дека неговата земја одлучно ќе продолжи да ги штити и брани своите права и интереси.
- Судири меѓу Азербејџан и Ерменија -
Турскиот претседател Реџеп Таип Ердоган порача дека настојувањето на Ерменија, по тешките загуби во судирите во Нагорно Карабах, да ја прикаже Турција во рамки на судирите, е само показател на нејзината безизлезна состојба.
„Настојувањето на Ерменија по тешките загуби да ја прикаже Турција во рамките на судирите е само показател на нејзината безизлезна состојба“, порача Ердоган.
„Индиферентноста на меѓународната заедница со години пред овие масакри и инвазии, игра улога во ерменската окупација на азербејџанските територии речиси 30 години“, изјави Ердоган, и додаде: „Азербејџан тогаш презеде акција за спасување на своите окупирани територии и сега си ги враќа регионите што Ерменија ги освои преку разбојништво.“
