Emre Aşıkçı
11 Февруари 2022•Ажурирај: 14 Февруари 2022
ИСТАНБУЛ (АА) ‒ Руската лизгачка Камила Василева била позитивна на забранета супстанција пред Зимските олимписки игри во Пекинг 2022 година, соопшти денеска Меѓународната агенција за тестирање (ITA), пренесува Агенција Анадолија (АА).
Василева (15) била позитивна на тестот за триметазидин, метаболички агенс што помага во лекување на ангина и вртоглавица, од примерокот земен за време на Руското првенство во уметничко лизгање во Санкт Петербург на 25 декември.
Оваа супстанција е забранета од Светската антидопинг агенција (WADA).
Тестот не беше потврден од меѓународно акредитираната антидопинг лабораторија во Стокхолм до 8 февруари.
Наодот ја натера Руската антидопинг агенција (RUSADA) привремено да ја суспендира Василева. Суспендирањето, сепак, беше укинато по жалба на Василева, дозволувајќи ѝ да се натпреварува на Зимските игри.
Меѓународната агенција за тестирање соопшти дека Меѓународниот олимписки комитет (IOC) ќе поднесе жалба против одлуката пред Судот за спортска арбитража (CAS).
„Меѓународниот олимписки комитет ќе го искористи своето право на жалба и нема да ја чека образложената одлука на РУСАДА, бидејќи одлуката е потребна пред следниот натпревар во кој Василева треба да учествува (уметничко лизгање во конкуренцијата жени на 15 февруари 2022)“, се вели во соопштението.
Претходно оваа недела, Василева стана првата жена која направи четирискок на олимписки натпревар.
На 7 февруари таа му помогна на Рускиот олимписки комитет (ROC) да освои златен медал во уметничко лизгање во Пекинг 2022 година.
‒ Дисциплинска истрага -
Во меѓувреме, РОК во соопштението рече дека Василева има право да тренира и да се натпреварува, освен ако КАС не одлучи поинаку во однос на нејзиниот статус со почит кон Олимпијадата.
„Во секој случај, Руската антидопинг агенција РУСАДА ќе спроведе дисциплинска истрага за основаноста на можното антидопинг прекршување во согласност со важечките правила според утврдената процедура“, се вели во соопштението.
Рускиот олимписки комитет додаде дека штом позитивниот примерок не бил земен за време на Олимписките игри, „резултатите на спортистката и резултатите на екипниот настап за време на Олимписките игри не се предмет на автоматска ревизија“.
Руските спортисти веќе се натпреваруваат без нивното знаме и химна поради допинг прекршувањата во минатото.
Зимските олимписки игри во Пекинг ќе траат до 20 февруари.
