Islam Uddin,Riyaz Khaliq Khaliq
02 Декември 2022•Ажурирај: 07 Декември 2022
АНКАРА / ИСТАНБУЛ (АА) - Јужна Кореја и Јапонија денеска воведоа нови санкции против девет поединци и девет институции во Северна Кореја поради вмешаност во тајните програми за нуклеарен и ракетен развој на режимот, пренесува Агенција Анадолија (АА).
„Министерството за надворешни работи во Сеул објави санкции против шест севернокорејски физички лица од Банката за надворешна трговија на Северна Кореја, Корејската банка „Даесонг“ и банката „Кумганг груп“, како и уште против две лица, еден Сингапурец и еден Тајванец“, објави Новинската агенција „Јонхап“.
„Оние кои се додадени на црната листа се функционери на финансиски институции поврзани со нуклеарната и ракетната програма на Северна Кореја, како и оние кои се вклучени во нелегални трансфери на санкционирани севернокорејски стоки“, соопшти агенцијата, цитирајќи го соопштението на Министерството за надворешни работи.
Сеул санкционира четири севернокорејски трговски и бродски компании и три бродски фирми со седиште во Сингапур.
Претходно, јапонската Влада, исто така, одлучи да ги замрзне средствата на две трговски компании, една хакерска група, како и на едно лице, поради нивната наводна „вмешаност во програмите за развој на нуклеарно оружје и ракети на Северна Кореја“.
„Ким Су Ил го претставува виетнамскиот огранок на Севернокорејскиот оддел за индустрија за муниција, кој е назначен ентитет вклучен во надзорот на програмите за оружје на нацијата“, изјави јапонското Министерство за надворешни работи за „Кјодо њуз“.
Главниот портпарол на Владата, Хироказу Мацуно, ги опиша ракетните тестови на Пјонгјанг како „сериозни и непосредни закани за Јапонија и меѓународната заедница“.
Најновиот развој се случи како одговор на севернокорејското лансирање ракета со долг дострел минатиот месец.
Во октомври, Јужна Кореја воведе санкции за 15 севернокорејски поединци и 16 институции како одговор на нејзините ракетни тестови и вежби на единиците за тактичка нуклеарна операција.
Пред објавата на Јужна Кореја и Јапонија, САД назначија и тројца високи севернокорејски членови на владејачката Работничка партија во врска со програмата за развој на оружје на земјата, според новинската агенција.
Тензиите на полуостровот се зголемија во 2020 година кога Северна Кореја ја нападна и ја разнесе Канцеларија за врски меѓу двете земји долж границата. Сеул се закани со силен одговор доколку Пјонгјанг „дополнително ја влоши ситуацијата“.
Сепак, тензиите дополнително се зголемија неодамна откако Сеул и Вашингтон одржаа заеднички воени вежби.
