Јапонија почна со изградба на домови за погодените од земјотресот

ИСТАНБУЛ (АА) - Јапонија денес започна со изградба на привремени домови за луѓето во префектурата Ишикава, тешко погодена од земјотресот што се случи на Нова година со магнитуда од 7,6 степени, пренесува Анадолу.

Властите на префектурата работат напорно за изградбата на околу 115 импровизирани куќи на четири локации во градовите Ваџима и Сузу во рок од еден месец, објави јапонската новинска агенција Кјодо њуз.

Јапонскиот закон обезбедува бесплатно привремено сместување за лицата погодени од земјотрес до две години додека жителите не најдат алтернативни услови за живеење.

Вкупно 215 лица, од кои околу 10 починаа поради здравствени проблеми, се прогласени за мртви, а 37 лица сѐ уште се водат како исчезнати 12 дена откако силните земјотреси го погодија полуостровот Ното во префектурата Ишикава на 1 јануари.

Властите од повеќе префектури рекоа дека ќе прифатат раселени лица од погодените зони.

Надлежните сè уште не можат да стигнат до околу 2.500 луѓе поради оштетените патишта, а постои загриженост дека лошите временски услови може да ги попречат операциите за пребарување и спасување.

Повеќе од 24.000 луѓе живеат во центрите за евакуација.