Шумските пожари се шират во jужна Франција, изгорени 2.000 хектари шума

Шумскиот пожар што избувна во понеделникот во јужниот француски департман Од и изгоре 2.000 хектари, сè уште гореше вчера, додека втор пожар избувна во близина на Марсеј, објавија француските медиуми, јавува Анадолу.

„Тоа е огромен пожар, фатени се 2.000 хектари, тоа е многу, многу голем пожар. Имаме ветер, значителна суша и покрај сите распоредени ресурси - повеќе од 1.000 пожарникари, повеќе од 7 авиони „Канадер“ (авиони за гаснење пожар) - пожарот не се гаси толку лесно“, изјави префектот на Од, Кристијан Пуже, за радиодифузерот ТФ1 Инфо.

Пуже, исто така, ги повика жителите да останат во своите домови.

Префектот на Од на X објави дека пет пожарникари се лесно повредени и дека досега се згрижени пет цивили, вклучувајќи едно дете.

Метеоролошката служба „Метео-франс“ издаде црвен аларм за уште три департмани во јужниот дел на Франција, укажувајќи на „многу голема опасност по должината на медитеранскиот брег“, бидејќи се очекуваат силни ветрови и високи температури.

Се вели дека послабиот ветер денес ќе ја намали опасноста од пожари, иако се очекува таа да остане висока.

Пожарот што избувна во понеделникот е трет за една недела во Од, бидејќи Европа минатата недела се соочи со интензивен топлотен бран на почетокот на летото.

Втор пожар избувна во медитеранскиот департман Буш-ди-Рон и изгоре 30 хектари за два часа.

Бидејќи пожарот, според наводите, стигнал до градот Марсеј, во тек се евакуации во одредени области, а жителите се повикуваат да останат во своите домови.

„Условите на терен се неповолни, пожарот се шири многу брзо“, изјавија пожарникарите за дневниот весник „Ле Фигаро“.

Според извештаите, сите летови се целосно суспендирани на аеродромот во Марсеј.