ИСТАНБУЛ (AA) – Шпанија денес соопшти дека природните ресурси на Венецуела им припаѓаат на венецуелскиот народ и предупреди дека секој обид за поткопување на државниот суверенитет би претставувал опасен преседан за меѓународниот поредок заснован на правила, јавува Анадолу.

Говорејќи во интервју за РНЕ, шпанскиот министер за надворешни работи Хосе Мануел Албарес нагласи дека контролата врз природните ресурси е суштински елемент на суверенитетот и мора да биде почитувана.

„Природните ресурси им припаѓаат на венецуелскиот народ“, рече Албарес, додавајќи дека тие се „дел од суверенитетот на една држава“.

Тој истакна дека настаните што се случиле во Каракас во последните денови претставуваат „многу опасен преседан“ за меѓународните норми, предупредувајќи дека нарушувањето на суверенитетот над природните ресурси може да доведе до дестабилизација на глобалните односи.

Алварес повтори дека Шпанија се противи на каква било употреба на сила или надворешно мешање во Венецуела, нагласувајќи ја поддршката на Мадрид за мирно и демократско решение, водено од самите Венецуелци.

„Шпанија поддржува широк дијалог меѓу власта и опозицијата, мирно, демократско и автентично венецуелско решение“, изјави тој.

Тој додаде дека Шпанија е подготвена да посредува „секогаш кога страните ќе сметаат дека тоа е корисно“.

Албарес нагласи дека пристапот на Шпанија во Латинска Америка е да дејствува како мост меѓу различните актери, а не да ги разгорува тензиите.

Шпанскиот министер предупреди и против какви било обиди за промена на границите со сила, јасно отфрлајќи ја реториката што сугерира можен потег на САД за запленување на Гренланд, изразувајќи целосна солидарност со Данска.

„Териториите не се менуваат произволно“, рече Алварес, нагласувајќи: „Постои народ на Гренланд кој јасно ја изразил својата волја и има право сам да одлучува“.

Тој ја потврди поддршката на Шпанија за Данска, додавајќи дека почитувањето на суверенитетот и владеењето на правото мора да останат неприкосновени принципи во меѓународните односи.

Гледано од поширока европска перспектива, Алварес повика на „морално преоружување“ и решителен чекор кон поголем политички, економски и стратешки суверенитет на Европската Унија, во услови на сè поголеми глобални предизвици – од војната во Украина до растечките геополитички тензии меѓу САД, Русија и Кина.

„Агресијата е агресија, без разлика кој ја извршува“, рече тој, истакнувајќи дека безбедносниот проблем на Европа „не се сојузниците, туку руската агресија“.

Според Алварес, актуелниот момент бара пообединета Европа, способна да зборува со сопствен глас.