ИСТАНБУЛ (АА) – Националниот суд на Шпанија денес започна кривична истрага против израелскиот премиер Бенјамин Нетанјаху, министерот за надворешни работи Израел Кац и неколку високи воени официјални претставници, поради наводите за вмешаност во воени злосторства и злосторства против човештвото, особено поради израелскиот напад минатиот месец врз хуманитарниот брод што беше упатен кон Газа, јавува Анадолу.

Истрагата се фокусира на нападот врз „Мадлин“ на 1 јуни, бродот на пат кон Газа, изјави шпанскиот европратеник Хауме Асенс на социјалната мрежа Х.

Бродот, кој превезуваше 12 меѓународни активисти и хуманитарна помош, беше пресретнат од израелските сили во меѓународните води. Меѓу притворените беше шведската еколошка активистка Грета Тунберг и француско-палестинската активистка за човекови права Рима Хасан.

Случајот е поднесен врз основа на принципот на универзална надлежност од страна на шпанскиот државјанин Серхио Торибиo и Комитетот за солидарност со арапската кауза.

Се наведува дека израелските сили употребиле дронови, солзавец и нелегално ги лишиле од слобода цивилите, што се опишува како дел од поширок образец на прекршувања поврзани со тековниот конфликт во Газа.

Судот побарал соработка со Меѓународниот кривичен суд (МКС) и го вметнува нападот во контекст на геноцидот во Газа.

Ова е првпат Шпанија да отвори официјална истрага против израелското раководство во врска со војната во Газа.

„Ова е голем чекор во борбата против неказнивоста. Кога државите не ги исполнуваат своите обврски, од граѓанското општество зависи да ја активира правдата како етичка, правна и политичка алатка против ужасот“, рече Асенс.

Доколку истрагата се потврди, таа би можела да ја ограничи можноста на Нетанјаху и другите израелски функционери да патуваат во Европа без ризик од потерници поврзани со случајот.

Израелската Влада сè уште не даде официјален одговор на развојот на настаните.