ИСТАНБУЛ (АА) - Бројот на Палестинци што се држени во израелските затвори изнесува 10.800, известува Анадолу.

Во заедничка изјава на Комитетот за затвореници и ослободени лица на Организацијата за ослободување на Палестина (ПЛО) и Здружението на палестински затвореници дадени се информации за Палестинците што се држат во израелските затвори.

Во изјавата се наведува дека бројот на Палестинци што се држат во израелските затвори до јули 2025 година се зголемил на 10.800, при што Палестинците задржани во логорите на израелската Армија не се вклучени во оваа бројка.

Се забележува дека ова е највисока бројка забележана од Втората интифада, позната и како Интифада Ал-Акса, во периодот помеѓу 2000 и 2004 година.

Меѓу лицата што се држат во израелските затвори, 50 се палестински жени, од кои две од Газа, а повеќе од 450 се деца.

Бројот на Палестинци што Израел ги држи во затвор како „административни притвореници“, без никакви обвиненија или судења, изнесува 3.629.

Во објавата се наведува дека во израелските затвори има 2.454 Палестинци класифицирани како „нелегални борци“.

Се додава дека жителите на Газа кои се наоѓаат во логорите на израелската Армија не се вклучени во оваа бројка.

Во изјавата дадена во август 2024 година од страна на Палестинското здружение на затвореници, Одборот за затвореници и ослободени лица на Организацијата за ослободување на Палестина и Управата за заштита на затворениците Замир, се вели:

„Израелското судство придонесува во злосторството на присилно исчезнување на затворениците и зголемување на тортурата врз илјадници затвореници од Газа. Злосторството на присилно исчезнување се спроведува врз основа на 'законот за нелегални борци' донесен од израелскиот Парламент во 2002 година и тоа, во суштина, е јасно и недвосмислено кршење на интегритетот на судската постапка.“