Шефот на граничната агенција на ЕУ поднесе оставка по истрагата за вмешаноста на агенцијата во незаконски истуркувања

БРИСЕЛ (АА) - Шефот на граничната агенција на ЕУ поднесе оставка по истрагата за вмешаноста на агенцијата во незаконски истуркувања, објавија повеќе медиуми денеска, пренесува Агенција Анадолија (АА).

Оставката на Фабрис Легери, извршниот директор на „Фронтекс“, доаѓа откако друга заедничка истрага на престижни европски медиуми откри дека и покрај јавното демантирање, граничната агенција на ЕУ била вмешана во незаконски истуркувања на мигрантите во Егејското Море, според нивната сопствена база на податоци.

„Политико“ (Politico), „Дер шпигел“ (Der Spiegel) и „Лајтхаус рипортс“ (Lighthouse Reports) објавија дека Легери поднел оставка, соопштувајќи ја својата одлука до Управниот одбор на агенцијата.

Канцеларијата за борба против измами на ЕУ (ОЛАФ) се очекува да го објави својот извештај за сомневањата околу раководството на „Фронтекс“.

Друг извештај на ОЛАФ, кој не беше споделен со пошироката публика поради чувствителноста на информациите, според официјален претставник на ЕУ, кој за Агенција Анадолија зборуваше во услови на анонимност - исто така ја потврди вмешаноста на „Фронтекс“ во истуркувањата.

Според изворот, Легери и други највисоки функционери биле, исто така, запознаени со нелегалната активност, но се обиделе да ја сокријат.

Заедничката истрага спроведена од францускиот весник „Ле монд“ (Le Monde), германскиот весник „Дер шпигел“ (Der Spiegel), швајцарските весници „СРФ Рундшау“ (SRF Rundschau), „Републик“ (Republik) и „Лајтхаус рипортс“ (Lighthouse Reports) со седиште во Холандија, во четвртокот откри дека „Фронтекс“ е вклучен во 22 истуркувања во периодот од март 2020 до септември 2021 година.

„Агенцијата на ЕУ ги сними инцидентите во кои најмалку 957 мигранти беа симнати од чамци, ставени на грчки спасувачки сплавови и оставени да пловат среде морето - како „превенција на заминување“, се истакнува во истрагата.