Serdar Dincel
14 Ноември 2024•Ажурирај: 15 Ноември 2024
ИСТАНБУЛ (АА) - Холандската полиција приведе десетици пропалестински демонстранти во Амстердам кои протестираа против заканата на Владата за депортирање на лицата со двојно државјанство по насилните судири поврзани со фудбалскиот натпревар минатата недела, јавува Анадолу.
Доцна синоќа полицијата ги приведе демонстрантите и ги стави во автобуси.
Протестот се случи откако Герт Вилдерс, холандски политички лидер од екстремната десница, препорача депортација на луѓето кои ги напаѓаа израелските фудбалски навивачи, доколку имаат двојно државјанство.
Насилството избувна пред и по гостувањето на фудбалскиот тим Макаби Тел Авив кој играше против Ајакс во Амстердам минатиот четврток, предизвикувајќи големо негодување. Според јавувањата, израелските навивачи предизвикаа тепачки со случајни минувачи, вандализираа имот и запалија палестинско знаме.
На видеата кои нашироко беа споделени на социјалните мрежи се гледаат навивачите на Макаби не само како вандализираат приватен имот, туку и како напаѓаат локален таксист, па дури и се судираат со службениците за спроведување на законот.
Властите во Амстердам воведоа тридневна забрана за демонстрации минатиот петок, при што беа уапсени над 60 лица, а на пет Израелци им беше потребна кратка хоспитализација.
На 7 ноември, Ајакс го победи тимот на Макаби Тел Авив со 5:0 во натпревар од Лига Европа на УЕФА.
Израел започна геноцидна офанзива врз Појасот Газа на 7 октомври минатата година, при што се убиени повеќе од 43.700 луѓе, а ранети се околу 103.000, додека енклавата стана речиси непогодна за живеење.
Израел се соочува со тужба за геноцид пред Меѓународниот суд на правдата поради неговите акции во Газа.
