Хамас: Палестинците го отфрлаат планот на Трамп за преселување

ГАЗА (АА) - Палестинската група на отпорот Хамас денес го отфрли повикот на американскиот претседател Доналд Трамп за преселување на Палестинците од Појасот Газа во Јордан и Египет, пренесува Анадолу.

„Нашиот народ, кој стоеше цврсто пред најстрашните акти на геноцид во модерната историја, извршени од фашистичката израелска окупаторска војска… категорично отфрлаат секакви планови за нивно преселување или депортација од нивната земја“, се вели во соопштението на Хамас.

Групата ја повика американската администрација „да се откаже од овие предлози, кои се усогласуваат со израелските планови и се судираат со правата и слободната волја на нашиот народ“.

Исто така, побара од американската администрација „да работи за да му овозможи на палестинскиот народ да ја постигне својата слобода и да воспостави своја независна држава со Кудс (Ерусалим) како главен град“.

Хамас, исто така, го повика Вашингтон да изврши притисок врз Израел „да ги забрза механизмите за обнова на она што е уништено за време на израелската брутална војна во Газа и враќање на нормалниот живот во Појасот“.

Исто така, апелираше до арапските и исламските земји, особено Египет и Јордан, „да ги потврдат своите цврсти ставови за одбивање на преселувањето и депортацијата“ и да обезбедат секаков вид поддршка за палестинскиот народ.

Опишувајќи ја Газа како „разрушено место“, американскиот претседател рече: „Речиси сè е уништено и таму умираат луѓе. Затоа, повеќе би сакал да се вклучам заедно со некои од арапските земји и да изградам домови на друга локација каде што можеби ќе живеат во мир за промена“.

Предлогот дојде една недела откако стапи на сила договорот за прекин на огнот во Газа на 19 јануари, запирајќи ја израелската геноцидна војна во која се убиени речиси 47.300 Палестинци, главно жени и деца, а најмалку 111.400 се повредени од 7 октомври 2023 година досега.

Договорот за прекин на огнот во три фази вклучува размена на затвореници и одржлив мир, со цел траен прекин на огнот и повлекување на израелските сили од Газа.

Како последица на израелските напади досега се исчезнати најмалку 11.000 луѓе, направено е големо уништување и создадена е хуманитарна криза.

Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во Газа.