Хамас очекува пресудата на Меѓународниот суд на правдата да го запре израелскиот напад врз Газа

ИСТАНБУЛ (АА) - Палестинската група на отпорот, Хамас, денес соопшти дека очекува Меѓународниот суд на правдата (МСП) во Хаг да издаде судски налог за веднаш да ги запре смртоносните израелски напади во Појасот Газа, пренесува Анадолу.

Во Трибуналот во Хаг денес започнаа сослушувањата во врска со тужбата поднесена од Јужноафриканската Република на 29 декември, во која Израел се обвинува за геноцид во Појасот Газа.

„Се надеваме дека судот ќе донесе пресуда во корист на правдата и ќе ги повика израелските воени злосторници на одговорност“, рече членот на Хамас, Басем Наем.

Јужноафриканската Република во ноември ги прекина односите со Израел како одговор на интензивираните напади на израелската војска врз Појасот Газа.

Во израелските напади што почнаа на 7 октомври врз Појасот Газа загинати се најмалку 23.357 Палестинци, а повеќето од жртвите се деца и жени. Ранети се 59.410 лица. Околу 85 отсто од населението на Газа е раселено во екот на една од најголемите хуманитарни кризи на денешницата.