AA
21 Февруари 2021•Ажурирај: 22 Февруари 2021
САРАЕВО
Портпаролот на Меѓународниот механизам за кривични судови (ММКС) во Хаг, Хелена Еглестон, изјави дека прашањето во која држава осудениот воен злосторник Радован Караџиќ ќе продолжи да ја служи казната доживотен затвор е во фаза на активно разгледување.
Додека се чека одлуката за тоа каде осудениот воен злосторник Радован Караџиќ ќе ја издржува доживотната казна затвор, што на 20 март 2019 година му ја изрече Жалбениот совет на Меѓународниот механизам за кривични судови (ММКС) , тој времето по пресудата го поминува во добро опремен простор во притворската единица во Хаг.
Хелена Еглестон за Агенција Анадолија (АА) појасни дека Караџиќ уште некое време ќе помине во Хаг. Инаку, не е пропишан рок во кој Караџиќ треба да биде испратен на издржување на казната.
„Прашањето во која држава Караџиќ ќе го издржува преостанатиот дел на неговата затворска казна е во фаза на активно разгледување. Процедурата што се однесува на тоа се основа на правната рамка на Механизмот и на досегашната практика. Во согласност со таа процедура, државата во која Караџиќ ќе ја служи казната ќе ја одреди претседателот на Механизмот откако ќе му бидат доставени неопходните информации од страна на секретарот“, наведе Еглестон.
На страниците на Механизмот се наведува дека Караџиќ би можел да ја издржува казната во државите членки на ОН кои го потпишаа договорот и се согласија да примат осуденици од Хаг. Држави што го направија тоа се Норвешка, Шведска, Финска, Данска, Естонија, Велика Британија, Белгија, Германија, Полска, Франција, Австрија, Италија, Шпанија и Португалија. Со оглед на тоа дека во државата што ќе го преземе мора да постои можност за изрекување доживотна казна затвор, Караџиќ нема да може да ја издржува казната во Норвешка, Естонија, Полска и Португалија.
„Караџиќ ќе ја издржува казната во една од земјите во кои во согласност со членот 25. (1) од Статутот на Механизмот е потпишан договорот за спроведување на казните“, појасни портпаролката Еглестон.
Во притворската единица на Обединетите нации во Хаг е и воениот злосторник Ратко Младиќ, поранешен командант на Војската на Република Српска (ВРС), кој во 2017 година неправосилно е осуден на доживотен затвор за геноцид во Сребреница и за други злосторства извршени во Босна и Херцеговина. Конечната пресуда ќе му биде изречена во првата половина од оваа година.
На фотографиите што во Хаг претходно ги забележа репортерот на Агенција Анадолија (АА) може да се види дека ќелиите на Притворската единица се добро опремени и удобни. Просториите се со големи прозорци и многу светла. Во собата има кревет, мијалник, ормар, полици за книги, стол, мала маса, автомат за кафе, телевизор... Во секоја од собите има и бања. Тука се и добро опремените амбуланти во кои работи притворскиот лекар и неговите помошници, кои се задолжени за пружање основна здравствена нега и услуги за итна помош во согласност со она што е на располагање во земјата во која се наоѓаат.
Притворениците добиваат храна која ги исполнува диететските стандарди, подготвена во согласност со современите хигиенски стандарди, под надзор на соодветен притворски лекар. Таквата исхрана, колку е можно, ја зема предвид животната старост, здравствената состојба, верските и културолошките потреби на притворениците.
Тука се исто така и собите во кои затворениците можат непречено да разговараат со своите адвокати и членови на семејствата. Притворениците не се разделуваат врз основа на етничката, националната, верската или класната припадност.
Со првостепената пресуда изречена во март 2016 година, Караџиќ е осуден на 40 години затвор. Судиите го прогласија Караџиќ за виновен за геноцид на подрачјето на Сребреница во 1995 година, за прогон и убиства на Бошњаците и Хрватите низ БиХ, тероризирање на населението на Сараево, гранатирање и снајперски оган и за земање на припадниците на мировните сили како заложници. Караџиќ во 2019 година пред ММКС правосилно е осуден на доживотна казна затвор.
