Француската полиција изврши претрес во седиштето на Организацискиот комитет на Олимписките игри во Париз

ПАРИЗ (АА) - Француската полиција изврши претрес во седиштето на Организацискиот комитет на Олимписките игри во Париз 2024, што се наоѓа во Сен Дени, 14 месеци пред одржување на игрите, пренесува Анадолу.

Истрагата што ја започна Националното финансиско обвинителство има за цел да собере информации во врска со доделувањето на јавните договори по извештајот на француската Антикорупциска агенција, која забележала потенцијални неправилности, се вели во веста на весникот „Ле Паризиен“.

Ниту една претходна најава за судска истрага насочена кон Комитетот не беше објавена пред претресот.

Јавниот обвинител рече дека претресите биле извршени како дел од две прелиминарни истраги отворени во 2017 и 2022 година, поради сомневање за незаконско преземање интереси и фаворизирање, објави телевизијата „Франс 24“.

Инспекторите ја пребаруваат и Солидео, компанијата одговорна за изградба на објекти за Олимпијадата.

Минатиот месец, Брижит Енрикез, претседателот на Францускиот олимписки комитет, се повлече од својата функција откако доживеа конфликти во француските олимписки кругови.