Филипинскиот вулкан Мајон и понатаму исфрла лава и пепел

МАНИЛА (АА) - Најактивниот и туристички најпривлечниот филипински вулкан Мајон, по минатонеделната ерупција, ослободува големи количества пепел и лава, а локалните власти го зголемија нивото на алармирање од второ до четврто ниво, пренесува Anadolu Agency (AA).

Институтот за следење на вулканска активност на Филипините соопшти дека вулканскиот пепел и чад се издигнуваат два и пол километри над вулканот, а локалното население е принудено да користи маски.

Ерупцијата на вулканот се случи во средината на минатата недела, а досега од тој регион се евакуирани најмалку 21.000 луѓе.

Вулканската лава се протега на два километри од кратерот од кој излегува, а радиусот од седум километри околу вулканот е прогласен за опасна зона.

Maјон е еден од најактивните вулкани на Филипините, а првата регистрирана ерупција датира од 1616 година.

Најголемата ерупција се случила во 1814 година. Градот Кагсава тогаш беше затрупан со вулканска кал, а животот го загубија најмалку 1.200 луѓе.

Последната трагична вулканска ерупција на Мaјон беше забележана пред пет години, кога животот го загубија пет планинари.